Б.Энхбаяр: БЗД-т найман хэсгийн ахлагч хүнсний талон авч байсан нь илчлэгдсэн

Аюулгүй байдал, гадаад бодлогын байнгын хорооны хуралдаанаар Цар тахлын хуулийг сунгах эсэхийг хэлэлцэж байна. Хэлэлцэж буй асуудлаар байнгын хорооны гишүүд байр сууриа илэрхийллээ. 

УИХ-ын гишүүн Ж.Энхбаяр Цар тахлыг хуулийг сунгах шаардлагагүй, Засгийн газарт өнгөрсөн хугацаанд хангалттай төсвийн эрх мэдлийг өгсөн. Цар тахлын хуулийг сунгаж Эрүүл мэндийн даатгалын сангийн мөнгийг туух гэж байна гэдгийг тодотголоо. Тэрбээр энэ тухай хэлэхдээ "Ковидын хуулийн үйлчлэлийг сунгахыг дэмжихгүй байна. Ковидын хууль үйлчилж байх хугацаанд Засгийн газар эрх мэдлээр дутаагүй. Төр болон иргэдийн хооронд итгэлцэл байж энэ цар тахлыг ялна. Гэтэл иргэдийн итгэлийг төр алдсан.Итгэлийг нэг л алдвал буцаж хэвэндээ орохгүй. Цар тахлын хуулийг сунгаж,  Эрүүл мэндийн даатгалын мөнгийг Засгийн газар захиран зарцуулах асуудлыг оруулж ирсэн байна. Энэ хэрхэвч байж болохгүй. Эрүүл мэндийн даатгалын сангийн 1 их наяд төгрөгийг зарцуулчихсан байгаа. Одоо үүнийг Засгийн газраас мөнгөжүүлэх боломж байхгүй. Нийгмийн даатгалын санд өртэй байгаа шүү. Одоо Эрүүл мэндийн даатгалын сангийн мөнгийг туух гэж байна. Энэ бол Засгийн газрын дураараа мэддэг мөнгө биш. Энэ бол иргэдийн ирээдүйд хадгалуулсан мөнгө. Иргэдээс асуухгүйгээр ийм шийдвэр гаргаж огт болохгүй. “Хойшлуулагдсан эрх бол үгүйсгэгдсэн эрх юм” гэж үг бий. Төр өөрөө ковидоос аюултай корона болчихсон байх вий дээ. Өнгөрсөн хугацаанд хүний эрхийн асуудалд Засгийн газар хэр мэдрэмжтэй хандсан бэ. Цар тахлын үед Улсын онцгой комисс шийдвэр гаргах үйл ажиллагаандаа Хүний эрхийн үндэсний комиссыг ч оролцуулахгүй, хянуулахгүй байгаа. Манай Баянзүрх дүүрэгт өмнө нь АН-ын үед томилогдсон найман хэсгийн ахлагч Ковидын үед хүнсний талон авч байсан нь илэрсэн.  Мөн коронавирусийн үед иргэдэд үзүүлж байсан тусламжаас авч байсан нь илэрсэн. Үүнийг цэгцлэх шаардлагатай" гэсэн юм.