Дутерте вакцин хийлгэхгүй байгаа хүмүүсийг баривчилна гэжээ

Филиппиний Ерөнхийлөгч Родриго Дутерте коронавирусийн эсрэг вакцин хийлгэхээс татгалзаж байгаа хүмүүсийг баривчилна гэж анхааруулсан тухай “Inquirer” сонин мэдээлсэн байна. Дутерте Ерөнхийлөгч улс орных нь хувьд чухал асуудлын талаар сэтгэл хөдлөлд автсан огцом мэдэгдэл хийдгээрээ алдартай гэж болно. Энэ удаад тэрээр корона вирусийн эсрэг вакцин хийхээс зайлсхийж байгаа хүмүүст хандан тун нухацтай анхааруулга хийжээ. Дутертеи “Намайг буруу ойлгох хэрэггүй шүү, гэхдээ энэ улсад чинь хямралын байдал үүсэж, онц байдал тогтоод байна. Хэрэв чи вакцин хийлгэхийг хүсэхгүй байгаа бол би чамайг баривчлаад хүчээр тарина. Вакцин хийлгэхгүй байгаа хүмүүс та нар бол хорлон сүйтгэгчид, та нар байдлыг улам лавшруулж байна” гэжээ.

 Мөн “Хэрэв вакцин хийлгэхгүй юм бол Филиппинээс яв. Энэтхэг эсвэл тэр Америк руу явж болно. Харин та энд байж, вирусийн боломжит тээгч болж байгаа юм л бол вакцин хийлгэ” гээд вакцинжуулалтаас зайлсхийж байгаа хүмүүсийг нэрсийн жагсаалтыг гаргахаар Дотоод яам, орон нутгийн захиргаанд хандаж магадгүй гэж анхааруулжээ.

 Үүний дараа Дутерте нь “Вакцин хийлгэхийг хүсэхгүй байгаа хүмүүс ер нь бол тэнэг хүмүүс. Тэд үнэндээ бол вирус тээвэрлэж энд тэнд очиж хүмүүст халдаагаад явдаг тээгчид. Вакцин хийлгэхгүй байгаа хүмүүс та нарт би ивермектин гээд гахайд тарьдаг вакцин хийнэ шүү. Тэгвэл вирус ч та нар ч үхнэ” гэжээ.

 Филиппиний Ерөнхийлөгч өмнө нь ч корона вирустэй холбоотой хатуу мэдэгдэл хийж байсан юм. Жишээлэхэд, хөл хорионы дэглэмийг зөрчсөн хүмүүсийг шоронд суулгах боломж олгох уулийн заалт хайж байна гэж мэдэгдсэн. Бас болоогүй эмч нарын анхааруулгыг үл тоон олон хүнийг хамруулсан арга хэмжээнд оролцож байгаа хүмүүст хорих ял онооно гэж анхааруулж байсан юм. Энэ сарын эхээр тэрээр корона вирусийн халдвар авсан ч хорио цээрийн дүрэм сахилгүй бусдад халдаан үхэлд хүргэж байгаа хүмүүст хүн амины хэргийн ял тулгах боломжтой талаар ярьж хүмүүсийг нэг хэсэг айлгаад авсан.

 Дутертегийн энэ бүх мэдэгдлийг тоохгүй байж болох ч мань хүн гол төлөв хэлсэндээ хүрээд байдаг. Жишээлэхэд, хар тамхины наймаачидтай хийх тэмцлийн хүрээнд мансууруулах бодис наймаалж байгаа хүмүүсийг шууд газар дээр нь буудах тушаал өгч байв. Энэ тушаал нь хэрэгжиж олон мянган хүн шүүхээр оролгүй газар дээрээ буудуулж амиа алдсан явдал олон улсын зүгээс хүчтэй шүүмжлэл дагуулсан. Иймд түүнийг вакцинаас зайлсхийж байгаа хүмүүсийг шоронд хорих тухай мэдэгдлийг филиппинчүүд тоглоом шоглоом гэж ойлгоогүй нь лавтай.

 Филиппиний удирдлага эдийн засгаа сэргээж, иргэдийн амьдралыг хэвийн болгохын тулд “сүргийн дархлаа” тогтоох  ёстой гэж байр суурийг хатуу баримталж байгаа аж. Гэвч филиппинчүүд вакцинд итгэхгүй байгаа нь үүнд ихээхэн саад учруулж байгаа юм байна. Жишээлбэл, Филиппиний судалгааны хүрээлэнгээс хүн амын дунд асуулга явуулахад филиппинчүүдийн ердөө 32 хувь нь корона вирусийн эсрэг вакцин хийлгэх бодолтой байна гэсэн хариу өгч эрх баригчдыг гайхшируулсан байна. Үүнтэй зэрэгцээд вакцины бодит үр нөлөө, аюулгүй байдалд эргэлзсэн хүмүүсийн тоо их байгаа аж.

 Зургаадугаар сарын 21-ий байдлаар Филиппинд 7 сая гаруй тун вакцин тарьсан байна. Гэтэл 101 сая гаруй хүн амтай, хүн амын нягтрал ихтэй Филиппиний хувьд энэ бол тун хангалтгүй тоо.  Филиппинд халдвар авсан хүний тоо 1,36 сая, корона вирусээс болж нас барсан хүний тоо 23,7 мянга болжээ.