Ж.Сүхбаатар: Монголд мэдээллийн хулгай хамгийн том эмгэнэл болсон

УИХ-ын Хууль зүйн байнгын хорооны өнөөдрийн хуралдаанаар Хүний хувийн мэдээлэл хамгаалах тухай хуулийн төсөл болон хамт өргөн мэдүүлсэн хуулийн төслүүд хэлэлцэх, эсэхийг хэлэлцэж байна. Энэ үеэр УИХ-ын гишүүн Ж.Сүхбаатар дараах байр суурийг илэрхийллээ. 

УИХ-ын гишүүн Ж.Сүхбаатар: 

"Маш чухал хуулийг хэлэлцэж байна. Би 10 жилийн өмнө Төрийн байгууллагын байнгын хорооны дарга байхдаа Мэдээллийн ил тод байдал, мэдээлэл авах эрхийн тухай  хуулийг батлуулж байсан. Харамсалтай нь энэ хуулийг сайн хэрэгжүүлж амжаагүй байтал Ерөнхийлөгч байсан Ц.Элбэгдорж Шилэн дансны хууль болгож өөрчлөөд хаа, гуяыг нь салгаад ашиглачихсан. Одоо энэ хуулийн нэр агуулгыг өөрчлөх гэж орж ирж байна. Гэхдээ хариуцлагын тал дээр нийтийн мэдээллийн дэд бүтцийг ашиглан олж авах солилцох боломжтой мэдээллийг хүн хуулийн этгээдээс шаардахгүй байх гээд зарчим болгосон байна. Энэ зарчмаасаа гадна заалт болгох шаардлагатай.  Үүнийг шаардаж байгаа бол ажлаас нь халах хэрэгтэй. Төрийн албаны болон Зөрчлийн тухай хуулиар зохицуулна гэжээ. Гэтэл зарим байгууллагад Төрийн албаны тухай хуулийн зохицуулалт байхгүй. Хоёрдугаарт, Монголд мэдээллийн хулгай, паразт байдал төрд байгаа хамгийн том эмгэнэл болсон. Нийтийн мэдээллийн хүрээнд олж авсан мэдээллийг хувийн болон бизнесийн зорилгоор маш их ашиглаж байна. Ардчиллын амин сүнс дарангуйлалгүй нийгэмд нийтийн мэдээлэл иргэдийг хүчирхэгжүүлж байдаг хамгийн гол зэвсэг, хамгаалалт. Энэ хуулийг бид чанарын шинэ шатанд гаргаж чадвал дараагийн том хууль болох Хувь хүний нууцыг хамгаалах, хадгалах гэсэн хуулийг гаргаж чадвал дарангуйлалтай нийгэм бий болохгүй. Ардчиллыг хамгаалах хамгийн том дархлаа нь иргэд байдаг. Иргэдэд мэдээлэл авах эрх чөлөө  нь байж эрх зүйн, эрх зүйт төрийн асуудал яригдана. Мэдээллийг нууцлах, мэдээллийг зүй бусаар ашиглахтай тэмцэнэ гэдэг нь  бид ардчиллын төлөө тэмцэж байгаа хэлбэр" гэсэн юм.