​ Ред Булл багийн М.Верстаппен Францын гараанд түрүүлэв

Авто спортын формула-1 уралдааны 2021 оны ДАШТ-ний ээлжит гараа өнгөрсөн амралтын өдөр Францын гранпригээр үргэлжиллээ. Улирлын найм дахь гараа Францын өмнөд нутгийн Ле-Кастелле дахь авто тойргуулгад болсон бөгөөд “Ред Булл” багийн М.Верстаппен тэргүүн байр эзэлсэн байна.

Байрлал тогтоох гараанд хамгийн хурдан байж ээлжит пол-позишн хийх эрхтэй болоод байсан “Ред булл” багийн Нидерланд нисгэгч М.Верстаппен ням гарагт болсон үндсэн гараанд 1 цаг 27 мин 25.770 сек-н амжилтаар ялалт байгуулсан. Түүний араас сүүлийн жилүүдэд “босоо” байгаа дэлхийн долоон удаагийн аварга “Мерседес” багийн Л.Хэмилтон 2.9 сек-н алдагдалтайгаар дэд байранд орсон бол “Ред Булл” багийн С.Перес удаалжээ.

Ийнхүү “Ред Булл” баг Францын гараанд хоёр нисгэгч нь хоёулаа шагналын тавцан дээр гарлаа. Энэ улирал “Ред Булл” маш хүчтэй өрсөлдөөнийг үзүүлж байгаа ба багийн уралдаанд 215 оноотой тэргүүлж алдарт “Мерседес” багийг ардаа орхиод байна. Дэлхийн аваргын дараагийн гараа энэ сарын 27-нд Австрид явагдана.