АНУ-ын Үндэсний аюулгүй байдлын зөвлөх Жейк Салливан Хятадын удирдлагад хандаж корона вирусийн гарал үүслийн талаар ахин мөрдлөг явуулаагүй тохиолдолд олон улсын тавцанд ганцаардана гэж сүрдүүлжээ.
Жейк Салливан “Fox News” сувагт ярилцлага өгөх үеэр корона вирусийг Хятадад гаргаж авсан талаар шинэ мөрдлөг явуулах зайлшгүй шаардлагатай гэдэгт Их долоогийн удирдлагыг ятгаж чадсан гээд “Ерөнхийлөгч Трамп ингэж чадаагүй. Харин Ерөнхийлөгч Байден чадсан” гэсэн байна. Мөн дэлхийн улс орнууд нэгдэн Хятадад шахалт үзүүлж байгаагийн гол зорилго нь цар тахлыг дэгдээсэн халдвар Хятадад хэрхэн үүссэн н талаар бодит мөрдлөг явуулах гэжээ. Хэрэв БНХАУ ингэж бодит мөрдлөг явуулахаас татгалзвал олон улсын тавцанд цор ганцаар тусгаарлагдах тухай анхааруулсан байна.
Гэвч БНХАУ нь Их долоогийн зүгээс Хятад шахалт үзүүлж, сүрдүүлж, албадаж байгаа нь олон улсын эрх зүйг ноцтой зөрчиж байгаа явдал гэж үзэж байгаагаа мэдэгдсэн. Корона вирусийн гарал үүслийн талаар мөрдлөг нь аль нэг улсыг шийтгэх, хүнд байдалд оруулах улс төрийг зорилгогүй байх ёстой гэж Бээжин мэдэгдэж байгаа юм.
COVID-19-ийн үүсгэгч нь амьтнаас хүнд халдах замаар бус харин Уханийн цэргийн лабораториос санаатай эсвэл санамсаргүй аль нэг байдлаар алдагдсан зохиомол аргаар гаргаж авсан вирус тул дэлхийг нөмрөөд байгаа цар тахлын хариуцлагыг Хятад үүрэх ёстой гэсэн санааг анх АНУ-ын Ерөнхийлөгч асан Трамп гаргаж ирсэн гэж болно.
Трампын үед Төрийн нарийн бичгийн дарга хийж байсан Майк Помпео нь корона вирусийг Хятадын Ухань дах лабораториос алдсан гэдгийг нотлох маш олон баримт бий гэж мэдэгдэж байсан. Помпео нь “Тэд хүмүүст үнэнийг мэдэгдүүлэхийг хүсэхгүй байна гэдэг нь тэдний буруутай гэдэгт эргэлзэх хэрэггүй гэсэн үг” гэж шууд буруутгасан. Харин Помпеогийн дарга асан Трамп Хятадаас АНУ-д учруулсан хор хохирлын нөхөн төлбөр гэж 10 их наяд долларын нөхөн төлбөр шаардаад байгаа юм.
Ерөнхийлөгч Байден нь Хятад цар тахалд буруутай гэсэн Трампыг байр суурийг анх бий болсон цагаас нь хүчтэй шүүмжилж, ор үндэсгүй гэж байсан ч Ерөнхийлөгчөөр сонгогдоод удаагүй байхдаа байр сууриа гэнэт өөрчилж, Хятадыг буруутгаж эхэлсэн. Батлагдаагүй мэдээгээр Хятадын тагнуулын албан өндөр албан тушаалтан Америк руу Уханийн лабораторийн талаарх нууц мэдээлэл авч зугтан гарсны дараа Байден ийнхүү байр сууриа өөрчилсөн аж.
Улаанбаатар °C 
Сэтгэгдэл (0)
Сэтгэгдэл бичигдээгүй байна