Токиогийн Олимпыг үзэгчгүй явуулна

Японы Засгийн газрын корона вирусийн тархалтыг зогсоох ажлын бүлэг Токиогийн Олимпын тоглолтыг үзэгчидгүйгээр зохион байгуулах нь илүү зохистой гэсэн санал гаргасан тухай “Kyodo” агентлаг мэдээлсэн байна. Шинжээчид “Тоглолтыг үзэгчгүйгээр явуулснаар спортын объектууд дээр корона вирус тархах эрсдэл хамгийн бага байх тул илүү зохистой” гэж мэдэгдсэн байна.

Токио 2020 Олимпын зохион байгуулах хорооны тэргүүн Сэйко Хасимото нь шинжээчдийн багаас гаргасан энэхүү санаачилгыг зургаадугаар сарын 18-ны өглөө хүлээж авсан тухайгаа мэдэгджээ. Одоо энэ саналыг зохион байгуулагчдын хурал дээр авч хэлэлцэнэ. Гэхдээ Засгийн газар нь огт үзэгчгүй явуулахыг дэмжилгүйгээр 10 мянга хүртэлх үзэгчдийг тоглолт үзэхийг зөвшөөрч магадгүй гэж байна. Японы Ерөнхий сайд Ёсихидэ Суг нь Японд цар тахлын үеэр спортын арга хэмжээ зохион байгуулахад мөрдөх дүрмийг Токиогийн Олимпын тоглолтоор ч адил мөрдөнө гэж мэдэгдээд байсан юм. Нутгийн иргэд тодорхой шаардлагыг биелүүлсэн нөхцөлд Олимпын тоглолтыг үзэх боломжтой байх аж.