Өмнөд Солонгосын Ерөнхийлөгч Олимпын тоглолтын үеэр Японд айлчилж магадгүй

Өмнөд Солонгосын Ерөнхийлөгч Му Жэ Инийг Токиод болох Олимпын тоглолтын үеэр Японд айлчлах боломжийг хоёр улсын Засгийн газар хэлэлцэж байгаа талаар “Yomiuri” сонин мэдээлсэн байна. Энэ айлчлалыг 2018 онд Өмнөд Солонгосын Пхёнчаны Олимпын үеэр Японы Ерөнхий сайд Абэ Синзо айлчлал хийж байсанд талархан хийж байгаа хариу айлчлал гэж олон нийтэд хүргэх юм байна. Энэ удаагийн айлчлалын үеэр Өмнөд Солонгосын Ерөнхийлөгч нь Японы Ерөнхий сайдтай уулзаж хоёр улсын харилцааны хурц асуудлуудаар хэлэлцээ хийж магадгүй байгаа аж. Гэхдээ хэлэлцээний үеэр хөндөх сэдвийн талаар Токиогийн талаар ихэд болгоомжтой хандаж байгаа юм байна.

Өмнөд Солонгосын шүүхээс Дэлхийн хоёрдугаар дайны үеэр Японы үйлдвэрүүдэд албан хүчээр ажиллаж байсан Өмнөд Солонгосын ажилчид, тэдний ар гэрт Японы зүгээс нөхөн төлбөр төлөх ёстой гэсэн шийдвэр гаргасны дараа энэ хоёр улсын харилцаа ихэд муудсан. Япон нь дайны үеийн Солонгосын ажилчдад 1965 онд нөхөн төлбөр төлсөн, илүү өгөхгүй гэсэн байр суурьтай байгаа. Харин Өмнөд Солонгос нь Японыг нөхөн төлбөр өгөөгүй тохиолдолд Өмнөд Солонгосын том компаниуд дах Японы компаниудын эзэмшдэг хувьцааг хураан авч нөхөн төлбөрт зарцуулна гэж мэдэгдсэн. Үүний дараа Япон нь электрон бүтээгдэхүүний үйлдвэрлэлд чухал ач холбогдолтой түүхий эдийг Өмнөд Солонгос руу гаргахад хориг тогтоож, Өмнөд Солонгосын электроникийн том компаниудыг хүнд байдалд оруулж байсан. Мөн хоёр улс Хойд Солонгосын талаарх тагнуулын мэдээ солилцохоо түр зогсоосон гэх мэтээр харилцаа нь нэлээд ээдрээтэй болж хувирсан юм.