Чех улсад вакцины эхний тун хийлгэсэн 20 мянган хүн COVID-19 тусжээ

Чех улсын Эмнэлгийн мэдээлэл ба статистикийн хүрээлэнгийн мэдээлж буйгаар тус улсад корона вирусийн эсрэг вакцины эхний тунг хийлгэсэн 20 мянган гаруй хүн COVID-19-өөр өвчилсөн байна. Ингэхдээ ийм хүмүүсийн хувьд дийлэнхдээ өвчин ямар нэг шинж тэмдэггүй, эрүүл мэндэд нь ноцтой аюул учруулахгүй байдлаар явагддаг болохыг эмч нар онцолжээ.  

Нийт 10,702 сая хүн амтай Чех улс нь 2020 оны арван хоёрдугаар сарын 27-оос корона вирусийн эсрэг вакцинжуулалтыг эхлүүлжээ. Одоогоор 4 сая 333 мянган хүнд вакцин хийгээд байгаагаас 1 сая 900 мянга нь вакцины хоёр тунг хийлгэжээ. Тус улс “Pfizer”, “Johnson & Johnson”, “AstraZeneca” компаниудын вакциныг ашиглажээ. Чехд нийт 1 сая 664 мянга 839 хүн халдвар авч 30 мянга 219 хүн өвчний хүндрэлийн улмаас нас барж, 1 сая 628 мянган хүн эдгэрсэн байна.