Х.Тэмүүжин: Тамганы булан булаацалдаж байгаа хүмүүс гишүүдээ хонь адил хашаанд хашиж байна

Ерөнхийлөгчийн сонгуулийн үр дүнтэй холбогдуулан УИХ-ын гишүүн Б.Пүрэвдорж, АН-ын гишүүн Х.Тэмүүжин, З.Нарантуяа нар "Эв нэгдэлтэй ардчилсан нам" сааачилга гаргаж, 100 мянган гишүүнээсээ гарын үсэг цуглуулах талаар мэдээлэл хийлээ.

АН-ын гишүүн Х.ТЭМҮҮЖИН: Ардчилсан нам өөрөө дотроо хоёр хуваагдаж, нэг нэгэндээ дэгээ тавихаас илүүтэй босож зогсоод нэгдэж, хамтарч, дэмжиж урагшаа алхах цаг болсон. Ардчилсан намгүй сонгууль, ардчилсан хүчингүй өрнөж буй үйл явцын хохирогч нь иргэд, улс орон болж байна. Тамганы булан барьж булаацалдаж байгаа хүмүүс гишүүдээ хонь адил хашаанд хашиж байгаа бол энэ нам эзэнгүй болно гэсэн үг. Тийм учраас өөр хоорондоо босгосон хашаагаа нурааж, гишүүдээ хонь гэж харахаас илүүтэй энэ орны тусгаар тогтнолд хүч өгдөг итгэл үнэмшилтэй иргэд гэж харж нэгдэх цаг болсон байна. АН-ын 100 мянган гишүүн ардчилалд итгэж улс орныхоо хувь заяаг шийдэхэд оролцоно гэж итгэсэн болохоос биш МАН-аар намынхаа асуудлыг шийдүүлнэ гэж бодоогүй. Зарим нь МАН-тай хамтарсан ажлын хэсэг байгуулж АН-ын хувь заяаг шийдэх гэж байна.