С.Эрдэнэ: Миний улс төрийн карьер дуусахгүй, дуусаасай гэж хүсдэг хүмүүсийн хүслийг биелүүлэхгүй

АН-аас Ерөнхийлөгчийн сонгуульд нэр дэвшсэн С.Эрдэнэ сонгуулийн дүнгийн талаар мэдээлэл хийлээ.

Тэрээр "Монгол Улсын зургаа дахь Ерөнхийлөгчийг сонгох сонгуулийн үйл ажиллагаа явж өндөрлөлөө. Өнөөдөр Сонгуулийн ерөнхий хороо сонгуулийн эцсийн дүнгээ гаргаж, тогтоол гаргасан байна. Сонгуулийн үйл ажиллагааг Сонгуулийн хуулийн хүрээнд явсан боловч их хэмжээний зөрчил гарсан. Ер нь бол Зөрчлийн болон Эрүүгийн хуулийн шинж хэлбэртэй олон үйлдэл хийгдсэн. Маш их хэмжээний мөнгө тараасан. Төрийн бүх шатны байгууллага, албан тушаалтнуудыг дайчилж, оролцуулсан. Төрийн бүх шатанд удирдах дээд байгууллагаас чиглэл үүрэг өгч, шахаж шаардсан байна. Сонгуулийн компанит ажилд үндсэндээ төрийн албыг бүхэлд нь дайчилж оролцуулсан. 

Энэ сонгуулийн дүнг харахад, эрх барьж байгаа  МАН  зарим улс төрийн хүчинтэй хамтарч, сонгуулийн үйл ажиллагааг зохион байгуулалттайгаар, хуулийн хүрээнд бус аргаар зохицуулах, шийдвэрлэх үйл ажиллагааг явуулсан байх магадлалтай. Энэ тал дээр АН цаашид хяналт тавина. Нийгэм, эдийн засаг ээдрээтэй байгаа үед У.Хүрэлсүх та Монголын ард түмэнд хандаж хэлсэн үг, амлалтаа бүү мартаарай. Үүсээд байгаа нөхцөл байдлын өмнө үүрэг хариуцлагаа ухамсарлаж, төрийн тэргүүний хувьд хариуцлагатай ажиллаарай гэж хэлмээр байна. Дарангуйлалгүй улс орон байна гэдэгт итгэж байна" гэв.

-Таны улс төрийн карьер дуусч байна уу?

-Миний улс төрийн замнал, карьер дуусаагүй. Би үйл хэрэг, үзэл баримтлалаа зориулах гэж улс төрд орсон болохоос биш аль нэг сонгуульд орсноор өөрийнхөө улс төрийн үйл ажиллагааг зогсооно гэж хараагүй. Ардчиллын төлөө 31 жил зүтгэж байна, цаашдаа ч би зүтгэнэ. Миний улс төрийн карьерийг дуусаасай гэж хүсдэг хүмүүс бий. Би тэдний хүслийг хангахгүй. 

-Танд сонгогчид бага санал өгсөн шалтгааныг хэрхэн харж байна вэ?

-Үзэл санаа, үнэт зүйлийнхээ төлөө би зогссон уу гэвэл зогссон.  Сонгуулийн луйвар, зохион байгуулалтыг өнөөдөр ч ярьдаг зүйл биш. Цаг хугацаа үнэнч шүүгч байдаг.