Талбайн теннисний сонгодог тулаан Р.Надалын эсрэг Н.Жокович

Газрын теннисний 2021 оны Ролан Гаррос буюу Францын Их дуулга тэмцээний эрэгтэй ганцаарчилсан төрлийн хагас шигшээд өрсөлдөх теннисчид тодорлоо. Францын Их дуулга тэмцээн нь календарын нэг жилд зохион байгуулагддаг газрын теннисний хамгийн том 4 Их Дуулга тэмцээний нэг бөгөөд 1891 оноос хойш зохиогдож байсан. 

Энэ удаагийн тэмцээний хагас шигшээ шатанд Р.Надал болон Н.Жокович нар таараад байна. Газрын теннисний өнгийг тодорхойлж буй хоёр теннисчин 57 удаа таарч тоглоход Н.Жокович хоорондын харьцааг 29-28-аар тэргүүлдэг. Ролан Гаррос тэдний 58 дахь удаагийн “тулаан” болно. 

Тэдний өрсөлдөөн 2006 оноос эхэлсэн бөгөөд өнгөрсөн хугацаанд 57 удаа тоглоход ямар нэгэн тэмцээний шигшээ шатанд 28 удаа таарахад 15-д нь Сербийн Новак Жокович хожсон байдаг бол Их дуулга тэмцээний хүрээнд 16 удаа таарахад 10-д нь Испанийн Рафаэл Надал ялалт байгуулж байжээ. Харин дээрх 57 удаагийн тоглолтоос 27 нь хатуу гадаргуутай талбай, 26 нь шороон гадаргуутай талбай, 4 нь зүлгэн талбай байсан. Шороон талбайд Р.Надал 19-7 харьцаагаар, хатуу гадаргууд Н.Жокович 20-7 харьцаагаар хоорондын харьцааг тэргүүлдэг бол зүлгэн гадаргууд харилцан 2-2 удаа ялалт байгуулж байсан. 

Ерөнхийдөө энэ удаагийн тоглолт Р.Надалын хувьд ялалт байгуулах боломж өндөр байгааг харуулж байна. Учир нь Ролан Гаррос нь шороон гадаргуутай талбайд болдог тэмцээн бөгөөд Р.Надал шороон гадаргуутай талбайд өрсөлдөгч Н.Жоковичийг буулгаж авдаг. Энэ удаагийн тоглолтонд Р.Надал ялалт байгуулж чадвал хоорондын харьцааг 29-29 болгоно. Хагас шигшээд ялалт байгуулсан нь Ролан Гарросын аваргын төлөө Германы А.Зверев болон Грекийн С.Циципас нарын хожсонтой нь тоглоно.