​С.Эрдэнэ: Асар их луйвар, хар хүчний эсрэг хүчин мөхөсдлөө

Монгол Улсын зургаа дахь Ерөнхийлөгчийг тодруулах сонгуулийн үр дүн урьдчилсан байдлаар гарсан. Тодруулбал, МАН-аас нэр дэвшигч У.Хүрэлсүх үнэмлэхүй ялалт байгуулсан. Харин хоёрт Зөв хүн электорат эвслээс нэр дэвшсэн Д.Энхбатадд  246.955 сонгогч саналаа өгсөн.Энэ талаар дөнгөж сая штабаас нь мэдээлэл хийж, Т.Доржханд "2020 оны сонгуульд оролцож байхад Хөдөлмөрийн үндэсний намд 209 мянган иргэн саналаа өгсөн байдаг бол нэг жилийн дараа 250 мянга болжээ. Өөрөөр хэлбэл бидний дэмжигчдийн тоо өссөн хэвээр байна. Бид цаашид ч Монголын улс төрд шинэ салхийг салхилуулах, эрүүл улс төр авч ирэх, зөв эрүүл хүмүүсийг нэр дэвшүүлэх болно гэсэн итгэл үнэмшлийг энэ удаа ч мөн авч чадлаа" гэдгийг тодотгосон. 

Харин одоогоор АН-аас мэдээлэл хийгээгүй байна. Тус  намаас нэр  дэвшсэн С.Эрдэнэ 72 мянга гаруй санал авсан. Тэрбээр сонгуулийн үр дүнгийн талаар  сошиал хаягаараа " Ардчиллын туг сүлд нь болж тусгаар Монгол Улсынхаа баталгаа болсон АН-ын үнэнч шударга гишүүддээ баярласан талархсанаа илэрхийлье. Та бид асар их луйврын хар хүчний эсрэг хүчин мөхөсдсөн ч үзэл санаандаа үнэнч үлдэж чадсандаа бахархах ёстой! Та нар маань ардчиллын баатрууд шүү!!" гэжээ.