АН-ын санхүүгийн албаны даргыг 23 сая төгрөгтэй явж байхад нь саатуулжээ

АН-ын санхүүгийн албаны даргыг өнгөрөгч шөнө бэлэн мөнгөтэй явж байхад нь баривчилсан тухай мэдээлэл гарсан. 

Энэ талаар АН-аас ерөнхийлөгчийн сонгуульд нэр дэвшигч С.Эрдэнийг саналаа өгөх үед нь  сэтгүүлчид тодруулахад тэрбээр, "Өнгөрөгч шөнө манай санхүүгийн албаны даргыг гэр рүүгээ орж явахад нь Эрүүгийн цагдаагийн газраас шалтгаангүйгээр баривчилсан .Ямар ч үндэслэл, шалтгаангүйгээр авч явсан. 23 сая төгрөгтэй явж байсан юм билээ. Манай дансыг мөн хаачихаад байгаа. Манай дээр шүүхийн тогтоол шийдвэр гарсан ямар ч асуудал байхгүй. Орон нутгийн телевизүүдийн төлбөрийг шилжүүлэх гэж байсан. Ганцаараа явж байсан эмэгтэйг хэдэн залуус хүчээр барьж, цүнхэнд нь хүртэл нэгжлэг хийсэн. Энэ бол гүйцэтгэх ажиллагаа гэж харж байгаа" гэсэн тайлбарыг өгөв.