Ч.Наранбаатар: Н.Түвшинбаяр МҮОХ-ны тамгыг буцаан өгөхөө утсаар мэдэгдсэн

МҮОХ-ны Гүйцэтгэх зөвлөл өнгөрсөн Баасан гаригт хуралдаж, Н.Түвшинбаярыг тус холбооны Ерөнхийлөгчөөс нь түдгэлзүүлсэн. Гэвч Н.Түвшинбаяр уг шийдвэрийг эсэргүүцэж, Нарийн бичгийн даргаараа дамжуулан тамгаа аваад зугтсан асуудал гарсан юм.

Уг асуудлаар МҮОХ-ны Ерөнхийлөгчийн үүрэг гүйцэтгэгч Ч.Наранбаатар мэдээлэл өгөхдөө “Тамга аваад явсан нь үнэн. Хэрэв Н.Түвшинбаяр Монголын үндэсний олимпын хорооны тамгыг энэ долоо хоногт багтаан өгөхгүй бол хууль, цагдаагийн байгууллагаар тус тамгыг хүчингүй болгуулж, ойрын үед үйл ажиллагаагаа сэргээн явуулна" гэдгийг хэлж байсан юм.

Тэгвэл энэ дагуу бид МҮОХ-ны Ерөнхийлөгчийн үүрэг гүйцэтгэгч Ч.Наранбаатартай дөнгөж сая холбогдож, дахин тодруулахад тэрбээр “ Н.Түвшинбаяртай өчигдөр утсаар ярьсан. Ажлаа өгч мөн тамгыг буцааж өгөхөө хэлсэн” гэлээ. 

Олон улсын олимпын хорооноос Монголын Үндэсний Олимпын хорооны ерөнхийлөгч Н.Түвшинбаярт холбогдолтой асуудалд ёс зүйн арга хэмжээ авсан эсэх, мөн тодорхой шийдвэр гаргасан тухай шаардлагыг МҮОХ-нд удаа дараа ирүүлсэн байдаг. Энэ дагуу МҮОХ-ны Гүйцэтгэх зөвлөлөөс түүнийг албан тушаалаас нь түдгэлзүүлэх шийдвэрийг гаргасан. Энэ шийдвэрийг баталгаажуулах тогтоолыг тамгаа авсны дараа үйлдэх юм.