Хятадын хакерууд Нью-Йоркийн метроны удирдлага руу халджээ

Нью-Йорк хотын тээврийн удирдах газрын компьютерын систем өнгөрсөн дөрөвдүгээр сард Хятадын эрх баригчидтай холбоотой байж болзошгүй хакеруудын дайралтад өртсөн тухай “The New York Times” сонин мэдээлсэн байна. Хакерууд нь метроны вагонуудын хөдөлгөөнийг хариуцсан системд нэвтэрч чадаагүй тул зоригчдын аюулгүй байдлыг эрсдэлд оруулж чадаагүй гэж байна. Гэхдээ хакерууд нь зам тээврийн удирдлагын 18 компьютер системийн гурвыг нь эвдэн орж хяналтаа түр тогтоож байсан аж. Иймд кибер дайралтаас учруулсан хохирлын хэмжээ харьцангуй бага байсан гэж байна.  

Сүүлийн үед хакерууд АНУ-ын томоохон дэд бүтцийн объектууд руу дайралт хийх нь олшроод байгаа. Тавдугаар сарын эхээр Оросын нутагт байрладаг гэх хакерууд шатахуун дамжуулах “Colonial Pipeline” хоолойн удирдлагад нэвтэрч бүрэн ажиллагаагүй болгон их хэмжээний мөнгө нэхсэн хэрэг гарсан. Үүнээс болж АНУ-ын хэмжээнд шатахууны үнэ огцом өсөж, олон муж улсад онц байдал зарлаж байсан. Гарцаагүй байдалд орсон “Colonial Pipeline” нь хакеруудад 4,4 сая доллар төлж байж ажиллагаагаа сэргээсэн.  

Тавдугаар сарын  31-нд мах боловсруулах чиглэлээр үйл ажиллагаа явуулдаг “JBS” компани нь мөн л Оросын нутагт байрлалтай гэх хакеруудын дайралтад өртсөн тухайгаа мэдээлсэн.