​ COVID-ийн эсрэг вакцин хийлгэсэн хүмүүсийг 10 сая долларын азын сугалаанд хамруулна

Америкийн Нью-Мексико мужийн удирдлагууд COVID-19 –ийн эсрэг вакцин хийлгэсэн хүмүүсийн дунд 10 сая долларын шагналын сантай сугалгаа явуулахаар болсон тухай “ABC News” мэдээлжээ. Мужийн амбан захирагч Мишель Лухан-Гришем энэ тухай “Вакцин хийлгэнэ гэдэг нь өөртөө ч зөв, гэр бүлдээ болон улс орондоо ч зөв юм хийсэн хэрэг. Иймд би вакцинжуулах үндэсний кампанит ажилд бага зэрэг хөөр баясал нэмж байгаадаа баяртай байна” гэжээ.

Энэхүү сугалааны хамгийн том шагнал нь 5 сая доллар байх юм байна. Ялагчийг наймдугаар сард зарлана. Үүнээс гадна мужийн дөрвөн дүүрэг тус бүрд нь 250 мянган долларын үнэ бүхий шагналын эзнийг тодруулах юм байна.

Одоогоор энэ мужийн вакцин хийлгэх эрхтэй хүмүүсийн 55 хувь нь хоёр удаагийн вакцинаа хийлгээд байгаа тул хүмүүсийг идэвхийг сэргээх үүднээс ийм арга хэмжээ авч байгаа юм байна. Сугалааны ачаар хоёр вакцинаа хийлгэсэн хүмүүсийн эзлэх хувийг маш богино хугацаанд 70 болгоно гэж эрх баригчид тооцож байгаа юм байна.

Америкийн бусад мужуудад ч вакцинжуулалтад хамрагдсан хүмүүсийн дунд янз бүрийн сугалаа явуулах болсон. Калифорни мужид 116 сая долларын шагналын сантай сугалаанаас тусгайлан 1,5 сая доллар гарган вакцинжуулагдсан хүмүүсийн дунд сугалаа зарласан байна.