Засгийн газар хүүхдийн эрхийг хангахтай холбоотой багц шийдвэрүүдийг гаргалаа

Засгийн газар өнөөдөр /2021.06.01/ ээлжит бусаар хуралдаж, хүүхдийн эрхийг хангахтай холбоотой багц асуудлыг хэлэлцэж шийдвэр гаргажээ. Энэ талаар Ерөнхий сайдын Хэвлэлийн төлөөлөгч Ч.Болортуяа мэдээлэл хийлээ. Ерөнхий сайд Засгийн газрын тэмдэглэлээр тодорхой үүрэг чиглэл өгсөн гэдгийг мэдээллийн эхэнд тодотгов.

1. Үндэсний соёл амралтын хүрээлэн буюу Хүүхдийн паркийн газрыг зориулалтын бусаар ашиглахыг хориглох, зориулалтын бусаар ашиглавал хувийн хэвшлийн эрхийг цуцлахыг хотын дарга Д.Сумъяабазарт даалгалаа.

2. “Найрамдал” олон улсын хүүхдийн зусланд бүрэн засвар хийх үүрэг, чиглэл өгөв. 1978 онд тус зусланг барьсан. Барилга ашиглалтын хувьд хүнд байдалд орсон. “Найрамдал”-2 зусланг байгуулах ажлын санхүүжилтийг 2022 оны улсын төсөвт тусгуулах чиглэл өглөө.

3. БЗД-ийн IV хороонд байрладаг Жанжин Лхагвасүрэнгийн гудамж Жуковын талбайд ААН-үүдэд олгогдсон газрыг цуцалж, нийтийн эдэлбэр газар болгон тохижуулахыг хотын даргад даалгалаа.

4. Амаржих газруудын ачааллыг бууруулах зорилгоор Нийслэлийн Хүрээ амаржих газар, ЭХЭМҮТ-ийн барилгад өргөтгөл засвар хийх төсвийг 2022 оны улсын төсөвт суулгах чиглэл өглөө.

5. Хүүхэд залуучуудын хөгжлийн зориулалтаар баригдсан төр, хувийн хэвшилд байгаа барилга байгууламжийг цаашид зориулалтын дагуу ашиглах, үүнийг төр, хувийн хэвшлийн хамтын ажиллагааны хүрээнд шийдвэрлэхээр боллоо. Энэ хүрээнд Бамбарууш кафе гэх мэт хувийн хэвшлийнхний мэдэлд очсон байгууламжуудыг зориулалтын чиглэлээр нь ашиглахаар болж байна. Бамбарууш кафе хуучин зориулалтаар буюу хүүхэд, гэр бүлд зориулсан чиглэлээр есдүгээр сараас ажиллаж эхлэхээ Засгийн газарт мэдэгдсэн байна. 

Засгийн газрын хуралдааны дараа Ерөнхий сайд Л.Оюун-Эрдэнэ 

1. Найрамдал зуслан
2. СХД-т баригдаж байгаа театр
3. ЭХЭМҮТ
4. Хоёрдугаар төрөх газарт тустус ажиллаж, зарим асуудлуудыг газар дээр нь шийдвэрлэхээр боллоо.