Латвид Беларусын хоккейн шигшээ багийг барьцаалах санал гаргажээ

Латвийн парламентын гишүүн Айгарс Бикше Рига хотноо болж байгаа хоккейн дэлхийн аваргад оролцохоор ирсэн Беларусын шигшээ багийг тамирчдыг бүгдийг баривчлаад дараа нь Беларусын шоронд байгаа улс төрийн хоригдлуудаар солих санал гаргасан байна. Айгарс нь өөрийн “Facebook” хуудсандаа “Надад нэг санал байна: Латви нь Беларусын хоккейн шигшээг баривчлаад дараа нь Латви-Беларусын хил дээр Беларусын алан хядагч дэглэмийн бүх улс төрийн хоригдлуудаар сольж суллана” гэжээ. Энэ саналыг Латвийн парламент дэмжсэн эсэх нь мэдэгдэхгүй байгаа ч Беларусын хоккейн шигшээ багийн эсрэг тун дуулиан дагуулсан үйлдэл хийжээ. 

Латвийн Гадаад хэргийн сайд Эдгарс Ринкевичс, Рига хотын мэр Стакис нар нь хоккейн дэлхийн аварга оролцож буй орон орны шигшээ багийн тамирчдын байрласан зочид буудлын гадна өлгөсөн Беларус улсын төрийн далбааг хуу татаж хаяад, оронд нь Беларусын сөрөг хүчний далбааг өлгөжээ. Тэд үүнийгээ Беларусын ард түмний төлөө хийсэн гэж мэдэгдсэн байна. Гэвч үүнийг нь Беларусын тал төрийн далбааг гутаан доромжилсон хэрэг гэж үзээд Беларусын талд эсэргүүцэл илэрхийлсэн төдийгүй Латви улсаас Беларуст суугаа Элчин сайдыг, ЭСЯ-ны бүх ажилтнуудын хамт 48 цагийн дотор Беларусын нутгаас гарахыг шаардсан нот бичиг өгчээ.