Үсчидээс хоёр дахь ​Үйлчилгээний гавьяат ажилтан төрлөө

Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жил, Ардчилсан хувьсгалын 32 жилийн ойг тохиолдуулан Монгол Улсын Ерөнхийлөгч Халтмаагийн Баттулга зарлиг гаргаж, салбартаа манлайлан ажилласан эрхмүүдэд Монгол Улсын Хөдөлмөрийн баатар цол, Ардын цол, Гавьяат цол, одон, медаль хүртээлээ.
Энэ үеэр  Монголын үсчин, гоо засалчдын холбооны гүйцэтгэх захирал Даваасамбуугийн Одонгоо Монгол Улсын Үйлчилгээний гавьяат ажилтан цолоор шагнагдлаа. Монгол Улсын Ерөнхийлөгч Х.Баттулгын Үйлчилгээний гавьяат ажилтан цолоор шагнах зарлигт "Гучин жил үсчин, гоо сайхны салбарт үр бүтээлтэй ажилласан Монголын үсчин, гоо засалчдын холбооны гүйцэтгэх захирал Даваасамбуугийн Одонгоод Үйлчилгээний гавьяат ажилтан цол хүртээж байна. Д.Одонгоо нь залуусыг ажилд мэргэжилдээ гарамгай болгон сургаж, шавь нар нь Ази, Европ, дэлхийн хэмжээний тэмцээнүүдэд өндөр амжилт гаргасан байна. Азийн аварга шалгаруулах тэмцээн, Дэлхийн аваргаас медаль хүртсэн үсчид түүний шавь нар дунд цөөнгүй бий" гэжээ.

Тэрбээр баярын сэтгэгдлээ хуваалцах үеэрээ амжилтад хүрэхэд нь хөтөлсөн  Монголын үсчин гоо засалчдын холбооны тэргүүн Ц.Цогзолмаа  болон Монголын Үсчин гоо засалчдын мэргэжлийн холбооны дарга Ж.Довчинсүрэн нартаа баярлаж явдгаа тодотгосон юм.

Ийнхүү  үсчидээс хоёр дахь Үйлчилгээний гавьяат ажилтан төрж байгаа юм. Хамгийн анх  энэхүү цолоор Төрийн ордонд насаараа үсчин хийсэн н.Цээсүрэн шагнагдаж байжээ.

“Vidal salon”-ны захирал Д.Одонгоо нь өнгөрсөн хугацаанд нийгмийн хариуцлагынхаа хүрээнд олон ажлууд хийж байсан. Түүнийг "Оддын үсчин Одонгоо" гэдэг бөгөөд салоноос нь  салбарлан гарсан хот, хөдөө орон нутгийн нийлээд 20 гаруй салбар үсчиний салонтай. "Шавь нараа тоолж үзээгүй" гэж тэрбээр нэгэн ярилцлагадаа өгүүлсэн.