Өчигдөр 60 орчим иргэн угаартаж, таван хүн нас баржээ

Урин дулааны цаг ирсэн ч цаг агаарын нөхцөл байдлаас шалтгаалан гэр хорооллын айл өрхүүдийн галалгаа хэвийн үргэлжилж байна. Бид өмнө нь цаг агаар хүйтэрсэн үед айл, өрхүүд яндангаа авч, өрхөө бүтээснээс үүдэн угаартах эрсдэл байгаа талаар мэдээлж байсан. Гэсэн ч сэрэмжлүүлэг мэдээлэл хүргэсээр атал угаартаж, улмаар эрдэнэт хүний амь нас эрсэдсээр байна. 

Тодруулбал: Өчигдөр /2021.05.25/ шөнө 60 орчим иргэн угаартаж, таван хүн нас барсан байна.  Харамсалтайгаар нас барсан иргэдийн гурав нь насанд хүрсэн иргэд бол хоёр нь бага насны хүүхдүүд байжээ. 

СХД-ийн 34-р хороо, Толгойтод оршин суух  хаягтай 52 настай эрэгтэй О.Б, 8 настай эрэгтэй Б.Г нар нь монгол гэрт сайжруулсан түлш түлээд угаартсан байдалтай, унтаагаараа нас барсан байна.

СХД-ийн 43-р хороо, Алтайн 5-502 тоотод оршин суух 21 настай Ц.Ц нь мөн л монгол гэрт сайжруулсан шахмал түлш түлээд угаартсан байдалтай нас барсан байна. 

Мөн Төв аймгийн Баянчандмань суманд иргэн О.А нь 1 нас 6 сартай хүүхдийн хамт сайжруулсан шахмал түлшинд угаартаж нас баржээ. Тухайн өрхийн 5 иргэн угаартаж, улсын нэгдүгээр төв эмнэлэгт эмчлүүлж байгаа аж. 

Иймд иргэд анхаарал, болгоомжтой байж зуухны яндангаа сугалж, өрхөө бүтээлгүй, угаар мэдрэгчээ тогтмол ажлуулахыг анхааруулж байна.