Путин Байден хоёр Швейцарт уулзана

АНУ-ын Ерөнхийлөгч Жо Байден, ОХУ-ын Ерөнхийлөгч Владимир Путин хоёрын уулзалт Швейцарын Женевхотноо болох тухай Америкийн “NBC” мэдээлсэн байна. Швейцарын хэвлэл мэдээллийн хэрэгслүүд ч энэ мэдээллийг баталсан мэдээ тараасан байна. Гэхдээ Швейцарын Гадаад яам энэ мэдээллийг батлаагүй ч бас үгүйсгээгүй байна. Швейцарын Гадаад яамны төлөөлөгч энэ талаар тайлбар өгөхдөө “Хувийн нууцыг хадгалах үүднээс бид энэ арга хэмжээний талаар дэлгэрэнгүй мэдээлэл өгч болохгүй байна” гэсэн ч Швейцар нь хүсэлт гаргасан тохиолдолд өөрийн нутаг дээр янз бүрийн уулзалт, хэлэлцээ хийх боломж олгоход бэлэн гэжээ.

Дөнгөж саяхан л Путиныг дэлхий даяар алуурчин гэж нэрлэж, шийтгэл амсуулна гэж мэдэгдэж байсан Байденгэнэт ийнхүү түүнтэй уулзаж, стратегийн чухал тохиролцоо хийхээр оролдож байгаад гайхах хүн цөөнгүй байгаа. Гэвч нөхцөл байдлыг анхааралтай ажиглавал энэ тийм ч гайхаад байхаар зүйл биш гэх судлаачид цөөнгүй байна. 

АНУ нь БНХАУ, ОХУ хоёрыг өөрийн стратегийг хамгийн гол дайсан, гол өрсөлдөгч гэж албан ёсоор тодорхойлоод байгаа юм. Үүнээс болоод Хятад Орос хоёрын харилцаа хэзээ ч байгаагүй дотно, уялдаа холбоотой болсон. Ийм нөхцөлд нэгдмэл байдлаар уялдаа холбоотой ажиллаж байгаа энэ хоёр хүчирхэг гүрэнтэй нэгэн зэрэг сөргөлдөх нь ялах магадлал бага, тун амаргүй ажил тул аль нэгтэй нь илүү дотносож, өөртөө татах замаар салгах, нэгдмэл байдлыг нь салгах шаардлага АНУ өмнө гарсан гэж судлаачид үзэж байна. Үүний тулд энэ хоёртой тус тусад нь хэлэлцээ хийж, хурцадмал байдлыг арилган аль нэгийг нь бага ч гэлээ өөртөө татах, нааштай харилцаатай болох оролдлого хийж байгаа юм байна. Хятадын талтай хэл амаа ололцохоор Аляскад уулзалт хэлэлцээ хийсэн ч ойлголцолд хүрч чадаагүй. Хятадын төлөөлөгчид Америкийн зүгээс гаргаж байгаа дээрэнгүй, захирангуй, зааварлаж чичилсэн хандлагыг хүлцэхгүй гэдгээ шууд мэдэгдсэн тул үндсэндээ тохиролцож чадаагүй гэж болно. Одоо Оростой тохиролцож, харилцаагаа хэвийн болгох замаар Хятадыг ганцаардуулах эрс шийдэмгий оролдлого хийж байна гэж судлаачид үзжээ.