АНУ-аас Лукашенкод удахгүй хариуцлага тооцно гэжээ

АНУ-ын Ерөнхийлөгчийн Үндэсний аюулгүй байдлын зөвлөх Жейк Салливан нь Минскт Ирландын “Ryanair” компанийн онгоцыг албадан газардуулсан талаар Беларусын сөрөг хүчний Ерөнхийлөгч гэгддэг Светлана Тихановскаятай хэлэлцсэн байна. АНУ-ын Ерөнхийлөгчийн зөвлөх нь онгоцонд бөмбөг нуусан гэж худал мэдээлэн албадан газардуулсныг “аюултай бөгөөд эрээ цээргүй” гэж тодорхойлжээ. Тэрээр баривчлагдсан Протасевичийг чөлөөлөхийг уриалаад “АНУ нь Европын холбоо болон бусад холбоотон болон түншүүдтэйгээ уялдаа холбоотой ажиллаж Лукашенкогийн дэглэмд хариуцлага тооцох болно” гэжээ.

 Лукашенко нь сөрөг хүчний нөлөө бүхий идэвхтнийг баривчлахын тулд онгоцыг албадан газардуулсныг АНУ, Европын холбоо маш хүчтэй шүүмжилж, Лукашенког янз бүрээр зүхэж байна. Гэтэл АНУ нь өөрийн тагнуулч Эдвард Сноуденийг оргосны дараа ямар ч үнээр хамаагүй саатуулахын тулд Боливийн Ерөнхийлөгч Эво Моралесынсууж явсан онгоцыг Австрийн нийслэл Вена хотод албадан буулгаж, нэгжлэг хийж байсныг шинжээчид сануулсан байна. Тэгэхэд 2013 оны долоодугаар сарын 13-нд Москвагаас нутаг буцаж явсан Боливийн Ерөнхийлөгчийн онгоцыг албадан газардуулахын тулд АНУ-ын хүчтэй шахалтын дагуу Франц, Испани, Итали, Португалийн Засгийн газрууд өөрийн агаарын орон зайгаар нисэхийн хориглосон. Ийм нөхцөлд ЭвоМоралесын сууж явсан онгоц арга буюу Вена хотод газардахад Австри дах Испанийн Элчин сайд онгоцонд орж албан бусаар нэгжлэг хийж, Сноуденийг хайж байсан юм. Гэвч Сноуден онгоцонд үгүй байсан тул ЭвоМоралесын онгоц удалгүй нутгийн зүг нисэж байв. Үүний дараа Болив болон Латин Америкийн орнууд энэ явдлыг олон улсын гэрээ хэлцлийг бүдүүлгээр зөрчин, тусгаар улсын Ерөнхийлөгчийн амь насыг эрсдэлд оруулсан дээрэнгүй үйлдэл гэж эсэргүүцэл илэрхийлж байсан. Харин АНУ-ын шахалтаар Боливийн Ерөнхийлөгчийн онгоцыг албадан газардуулж, нэгжлэг хийх ажиллагаанд оролцсон Франц, Португал, Испани болон Италийн удирдлагууд албан ёсоор уучлал гуйж байсан билээ. Тэгэхээр Беларусын эрх баригчдад сөрөг хүчний идэвхтнийг баривчлахын тулд онгоц газардуулах үлгэр дуурайллыг АНУ, Европын холбооны гишүүн орнууд өөрсдөө өгч байсан тул энэ удаад элдвээр шүүмжлэх нь илүү гэсэн байр суурь ч байна.