Л.Оюун-Эрдэнэ: Хотын төвд төрийн байгууллагын барилга бариулахгүй

Ерөнхий сайд Л.Оюун-Эрдэнэ болон Нийслэлийн Засаг дарга бөгөөд Улаанбаатар хотын Захирагч Д.Сумъяабазар нар өнөөдөр /2021.05.25/ Чингэлтэй дүүрэгт ажиллалаа. Энэ үеэр  Ерөнхий сайд Л.Оюун-Эрдэнэ “Хотын төвд төрийн байгууллагын оффис бариулахгүй хязгаарлах бодлого барина. Харин төвөөс хотын зах  руу гарч байгааг нь дэмжинэ” гэсэн байр суурийг илэрхийллээ.Тодруулбал, 2024 он хүртэл хотын төвд  шинээр барилга барихыг дэмжихгүй. Түүнчлэн оффисын байрыг гаргахаас наана тухайн байгууллагад ажиллаж байгаа ажилчдын гэрийг хотхон хэлбэрээр барьж байгуулах хэрэгтэй. Хэрвээ  ингэж чадвал  ипотекийн зээлтэй холбоод өгч болно” гэв.

Энэ хүрээнд зургаан дэд төв ашиглалтад орсноор төрийн ямар байгууллагуудыг хотын зах руу шилжүүлэх төлөвлөлт гаргаж, Засгийн газрын хуралдаанаар танилцуулаарай гэдэг чиглэлийг Нийслэлийн Засаг дарга бөгөөд Улаанбаатар хотын Захирагч Д.Сумъяабазарт өгөв.

Дээд шүүхийн шинэ байрыг зургаан дэд төвийн аль нэгэнд барих мөн БХБЯ-ыг хотын зах руу гаргах зэрэг бусад төрийн байгууллагаа уриалаад хотын төвөөс гаргахыг энэ үеэр Ерөнхий сайд тодотгожээ.