Беларусын тусгай олон улсын нислэгийг саатуулж тэрс үзэлтнийг дайчлан баривчилжээ

Грекийн Афин хотоос Литвын Вильнюс орох нислэг үйлдэж явсан онгоцыг Беларусын нутаг дээгүүр нисэх үеэр онгоцонд тэсрэх бөмбөг байгаа тухай мэдээлэл ирж онгоц яаралтай газардсан хэрэг тавдугаар сарын 23-нд гарч олон улсын анхаарлыг татсан. Гэтэл онгоц газардсаны дараа ямар ч тэсрэх бөмбөг илрээгүйн дээр Беларусын тусгай албад онгоцонд сууж явсан Лукашенког эсэргүүцэгч, тэрс үзэлтэн, сөрөг хүчний нөлөө бүхий төлөөлөгч болох Роман Протасевичийг дайчлан баривчилсан хэрэг гарсан байна. Роман Протасевич нь 2020 оны Ерөнхийлөгчийн сонгуулийн эсрэг ард олны жагсаал цуглааны талаарх мэдээлэл тарааж байсан “Nexta” сувгийг үүсгэн байгуулж, Лукашенкогийн Засгийн газрын заналт дайсан болоод байсан юм. Улмаар Беларусын эрх баригчид Протасевичийг олон нийтийн эмх замбараагүй байдал үүсгэсэн, Беларусын хууль сахиулах байгууллагын ажилтнуудын эсрэг олон нийтийг турхирсан хэргээр алан хядагчдын тоонд оруулж, эрэн сурвалжлаад байсан юм. 

  Ийнхүү Беларусын эрх баригчид олон улсын нислэгийг бүдүүлгээр тасалдуулж, олон зуун хүний амийг эрсдэлд оруулан тэрс үзэлтнийг баривчлах тусгай ажиллагаа явуулсныг Европын холбооны комиссын тэргүүн Урсула фон дер Ляйен эрс шүүмжилж, байж боломгүй үйлдэл гэжээ. Тэрээр тасалдсан нислэгээр зорчиж явсан бүх зорчигчид Вильнюст ирэх ёстой гэж мэдэгдэн байна. Литвын Ерөнхийлөгч Гитанас Науседа нь энэ хэрэгтэй холбоотойгоор НАТО болон Европын холбооны бүх холбоотнууддаа хандан Беларусын дэглэмийн зүгээс олон улсын иргэний нисэхэд аюул учруулсанд зохих анхаарал хандуулахыг ариулж, Протасевичийг чөлөөлөхийг шаарджээ. Австрийн Засгийн газар ч энэ хэргийг маш нарийн шалгахыг уриалсан байна.