“The Wall Street Journal” сонин Америкийн гадаад тагнуулын албаны мэдээлэлтэй танилцсаны дараагаар
Хятадад корона вирусийн тахал дэгдэхээс бүр өмнө, 2019 оны арваннэгдүгээр сард Ухань хотын Вирус судлалын хүрээлэнгийн гурван ч эрдэмтэн хүнд өвдсөн байсан тухай мэдээлсэн нь ихээхэн дуулиан тариад байна.
Сонины дурдаад байгаа тагнуулын мэдээлэл нь үнэн бол аймшигт цар тахал дэгдээсэн корона вирус нь байгалийн бус харин зохиомол, тэр дундаа Хятадын эрдэмтдийн бүтээл байх магадлал эрс нэмэгдэж байна гэсэн үг юм. Тус сонины бичиж байгаагаар сэтгүүлчид нь АНУ-ын тагнуулын албаны олон нийтэд танилцуулаагүй илтгэлтэй танилцаж чадсан байна. Улмаар тус илтгэлд агуулагдаж байгаа мэдээлэл нь халдварын гаралт үүслийн талаарх илүү өргөн цар хүрээтэй мөрдлөг явуулах уриалгад хүч нэмэх нь гарцаагүй гэсэн байна. Трампын захиргаанд Төрийн нарийн бичгийн дарга хийж байсан Майк Помпео нь Хятадыг 2019 оны намар, анхны тохиолдол албан ёсоор бүртгэгдэхээс өмнө Уханийн вирус судлалын төвийн ажилтан корона вирусээр өвдсөн тохиолдолд тайлбарлахыг шаардаж байсан юм.
“The Wall Street Journal” сонины бичиж байгаагаар Уханийн вирус судлалын төвийн гурван ч эрдэмтэн 2019 оны арваннэгдгээр сард корона вирусийн их хүнд хэлбэрийн халдвар авсан тул хэвтэж эмчлүүлж байсан гэж байна. Гэхдээ тус сонин нь эрдэмтдийн өвдсөн өвчнийг яг COVID-19 гэхгүй байгаа ч энэ өвчинтэй шинж тэмдэг төстэй гэсэн байна. Үүнээс гадна тус сонин энэ мэдээллийн талаар БНХАУ-ын Гадаад яамнаас тайлбар авч чадсан байна. Гадаад яамны төлөөлөгч нь АНУ-ын вирус лабораториос алдагдсан хоосон таамгийг улам дэвэргэж байна гэж мэдэгдээд, АНУ нь үнэхээр вирусийн гарал үүслийг тогтоохыг хүсэж байгаа юм уу эсвэл анхаарлыг өөр тийш сарниулаад байгаа юм уу гэж асуусан байна.
Гуравдугаар сарын сүүлээр Хятадын Гадаад яамны албан ёсны төлөөлөгч Хуа Чуньин нь корона вирусийн АНУ-ын Форт-Детрик болон түүнтэй төстэй бусад улсын лабораториос алдагдсан байж болзошгүй тухай хувилбарыг ДЭМБ судалж үзэх ёстой гэж мэдэгдэж байсан юм. Мөн Хятад нь корона вирусийн гарал үүслийг судлах ажилд цаашдаа ч хамтрахад бэлэн гэж байсан.
ДЭМБ нь энэ оны эхээр COVID-19-ийн үүсгэгчийн гарал үүслийг тодруулах зорилгоор олон улсын шинжээчдийг Хятад руу явуулсны дараа гуравдугаар сард тайлангаа танилцуулсан. Түүнд мэргэжилтнүүд корона вирусийн үүслийн талаар нэгдсэн дүгнэлтэд хүрч чадаагүй байсан. Тэд вирус нь амьтнаас өөр амьтанд дараа нь хүнд халдсан байх магадлал хамгийн өндөр, харин вирус лабораторид бий болсон гэх магадлал хамгийн бага гэсэн дүгнэлт хийсэн байсан.
Энэ дүгнэлтийг дэлхийн 14 орон шууд эсэргүүцэн шүүмжлээгүй ч ДЭМБ-ын Хятадад хийсэн судалгаанд сэтгэл түгшиж байгаагаа илэрхийлсэн. Цагаан ордон бол энэ тайланг шийдвэрлэх ач холбогдол мэдээлэл агуулаагүй, асуудлыг бүрэн дүүрэн ойлгох боломж өгөөгүй гэж эрс шүүмжилж байсан.
Ингэснээр Хятадыг корона вирусийг лабораторидоо бий болгоод санаатай эсвэл санамсаргүй байдлаар алдсан нь цар тахлыг эхийг тавьсан гэх хардалт овоо намжиж байснаа ахиад газар авч эхэллээ.
Улаанбаатар °C 
Сэтгэгдэл (0)
Сэтгэгдэл бичигдээгүй байна