Хятадын тал Америкийн байлдааны усан онгоцыг хил зөрчсөн гэж буруутгав

Хятадын батлан хамгаалах яам АНУ-ын Тэнгисийн цэргийн хүчний усан онгоцыг Параселийн арлуудын орчим Хятадын усан хилийг зөрчсөн гэж буруутгалаа. Үүнтэй холбоотойгоор Хятал нь АНУ-д эсэргүүцэл илэрхийлж мэдэгдэл гаргажээ. Тус мэдэгдэлд “Тавдугаар сарын 20-нд Америкийн Curtis Wilbur усан онгоц нь БНХАУ-ын Засгийн газрын зөвшөөрөлгүйгээр Хятадын Сиша олтиргийн дагуух усан хилийг хууль бусаар зөрчин нэвтэрсэн байна” гэжээ. Ингэж зөрчсөний дараа Хятадын байлдааны нисэх онгоц ба усан онгоцнууд Америкийн онгоцонд анхааруулга өгч тасралгүй мөшгөсөөр Хятадын усан хилийн бүсээс шахан гаргажээ.

Энд нэр гараад байгаа Өмнөд Хятадын тэнгис дэх Сиша олтриг буюу Параселийн арлууд, түүний ойролцоох Спартли олтриг нь олон улс орнуудын хувьд хэрүүлийн алим болж хувираад байгаа юм. Эдгээр олон жижиг арлууд нь Энэтхэгийн далай ба Номхон далайн арилжааны замуудын зангилаа дээр байрладгаас гадна хүрээлсэн эрэг орчмын ёроолд нь их хэмжээний газрын тос, эрдэс түүхий эд байгааг саяхнаас тогтоосон. Иймд эдгээр арлуудыг Хятад өөрийнх гэж цэргийн хүчээр хамгаалдаг бол Вьетнам мөн адил өөрийн газар нутаг гэж ширүүн тэмцэл явуулдаг. Үүнээс гадна эдгээр бүлэг арлуудын зарим нэлээдийг Бруней, Малайз, Тайвань, Филиппин зэрэг улсууд өөрийн газар нутгийн хэсэг гэж булаацалддаг юм. 

АНУ нь эдгээр арлуудын талаарх маргаанд хэн нэгнийх нь талыг илэрхий баримтлаад байдаггүй ч эдгээр арлуудыг ямар ч байсан БНХАУ-ын мэдлийнх гэдгийг хүлээн зөвшөөрдөггүй бөгөөд үе үе маргаантай арлуудын эрэг орчмын усаар зөрчиж, хятадуудын уур хилэнг бадраадаг.