Ковидоор нас барсан иргэнийг оршуулах ажилд ар гэрийнхнийг нь оролцуулах журмаа хэзээ мөрдөх вэ

Монгол Улсад Сovid-19-ийн шалтгаант нас баралт өнөөдрийн байдлаар 235 бүртгэгдээд байна. Сovid-19-ийн батлагдсан болон сэжигтэйгээр нас барсан хүмүүсийн цогцосыг ар гэрт нь өгөхгүй тусгай журмын дагуу “Улаанбаатар Буян” ХХК оршуулах үйл ажиллагааг гүйцэтгэж байгаа. Өөрөөр хэлбэл, ар гэрийнхэнтэй нь салах ёс гүйцэтгүүлэхгүй. Хэдийгээр халдварт цар тахал өвчнөөр нас барсан ч гэлээ талийгаачтай салах ёс хийх боломжгүй байгаа нь ар гэрийнхэнд нь маш хүнд тусч байгаа. Алсын зайнаас ч  гэсэн талийгаачийг сүүлчийн замд нь үдэхийг тэд хүснэ. 

Уг нь Эрүүл мэндийн сайдын тушаалаар  коронавирусийн халдвараар батлагдсан болон сэжигтэй цогцсыг оршуулахад баримтлах түр журмыг энэ оны дөрөвдүгээр сарын 16-нд шинэчлэн баталжээ.

 Уг журамд тусгаснаар цогцсыг зориулалтын газарт чандарлах болон булшлах аргаар оршуулна.Ингэхдээ оршуулах үйл ажиллагааг хяналтын багийн удирдлага дор ар гэрийн төлөөлөл гүйцэтгэнэ гэж тусгасан хэдий ч энэхүү журам өнөөдөр мөрдөгдөхгүй байна. Түүнчлэн Сovid-19-ийн шалтгаанаар нас барсан хүмүүсийн асуудлаар ХҮЭК-оос  Эрүүл мэндийн сайд С.Энхболдод зөвлөмж хүргүүлсэн байдаг.Энэхүү зөвлөмжид  (КОВИД-19)-тай холбоотой нас баралт нэмэгдэж байгаа нас барсан хүмүүсийн гэр бүлийн хүсэл зориг, ёс заншил, шашин шүтлэгийг хүндэтгэх, салах ёс гүйцэтгэх боломжийг дээд зэргээр бүрдүүлэхийг зөвлөсөн. 

ЭМ-ийн сайдын шинээр баталсан журамд:

• Салах ёс гүйцэтгэхэд дараах халдвараас сэргийлэх дэглэм баримтална.
•  Ар гэрийнхэн цогцост хүрэхгүй, цогцосны уутыг нээхгүй.
• Хүн хооронд 1-1.5 метрээс доошгүй зай барих
• Салах ёс гүйцэтгэх үйл ажиллагаанд ар гэрийн 10 хүртэлх хүний төлөөлөл оролцуулах
• Ар гэрийн төлөөлөл амны хаалт, нэг удаагийн бээлий өмсөх
• Хайрцагтай цогцсыг өргөх, таглах зэргээр хайрцаганд хүрэх ар гэрийн гишүүд болон оршуулах үйл ажиллагаа эрхлэх байгууллагын ажилчид амны хаалт, нэг удаагийн бээлийтэй байна.
• Оршуулгын үйл ажиллагаанд оролцож буй гэр бүлийн гишүүдийн нэрсийн жагсаалт, холбоо барих утасны дугаарыг оршуулгын ёслолын өмнөх өдөр бүртгэж авна.
• Гэр бүлийн гишүүд  цогцост хүрэхийг хориглоно.
•  Хяналтын баг оршуулгын үйл ажиллагааны тэмдэглэл хөтөлж, багийн гишүүд гарын үсэг зурж баталгаажуулна.

Коронавирусийн халдвараар батлагдсан болон сэжигтэй цогцсыг оршуулахад баримтлах түр журамд талийгаачтай салах  ёс гүйцэтгэх үйл ажиллагаанд ар гэрийн 10 хүртэлх хүний төлөөлөл оролцуулна гэсэн энэхүү журмаа мөрдөж, талийгаачтай салах ёс гүйцэтгэх боломжийг хангаж өгөхийг иргэд хүсч байна.