Шүүгчээсээ түдгэлзээд, гэмт үйлдлээ шалгуулаач Б.Мөнхбаяр шүүгчээ

Монголын өдөр тутмын сонинуудын эрэн сурвалжлагч нэгдлээс нэр бүхий шүүгчид өмгөөлөгчөөс мөнгө шилжүүлэн авсан баримтуудыг өнгөрөгч гуравдугаар сард олон нийтэд дэлгэсэн. Тодруулбал, өмгөөлөгч Б.Баасанцогт 2017 оны есдүгээр сараас 2021 оны нэгдүгээр сарын 27-ныг хүртэлх хугацаанд таван шүүгч, зургаан шүүхийн ажилтан 11 хүнд 47.2 сая төгрөг шилжүүлсэн байдаг. 

Тэдний дунд Баянгол, Хан-Уул дүүргийн Иргэний хэргийн анхан шатны шүүгч Б.Мөнхбаярын ч нэр багтаж түүний 507603....дансанд 2019.8.30-нд 5 сая, 2020.4.7-нд 5 сая, нийт  10 сая төгрөгийг шилжүүлсэн нь банкны хуулгаас харагддаг.

 Гэтэл өнөөдрийг хүртэл уг хэрэг “дарагдах” шинжтэй. Баянгол, Хан-Уул дүүргийн Иргэний хэргийн анхан шатны шүүгч Б.Мөнхбаяр өнөөдөр  юу ч болоогүй мэт ажлаа хийж, хэргийн үнэн, худлыг дэнсэлж сууна. Уг нь ичих нүүр, ёс зүйн хэлтэрхий байсан бол Б.Мөнхбаяр шүүгчээсээ түдгэлзээд гэмт үйлдэлд оролцсон эсэхээ шалгуулах ёстой. 

Үүнийг ч Шүүхийн ерөнхий зөвлөлөөс шаардаж, дээрх асуудалд холбогдосн таван шүүгч, шүүхийн захиргааны зургаан ажилтанд мэдэгдэл хүргүүлээд багагүй хугацаа өнгөрч байна. Тус мэдэгдэлд шүүгч, шүүхийн байгууллагын нэр хүндийг сэвтээж байгаа энэ асуудлаар хууль хяналтын байгууллагад шалгуулахыг хүссэн байдаг. Гэвч одоогоор ажлаа хийсээр, хэн нь  ч хариуцлага хүлээсэнгүй. 
Уг асуудалд УИХ-ын нэр бүхий гишүүд анхаарал хандуулж, хууль хяналтын байгууллагыг шалгахыг шаардсан. “Хэрэг төлөвлөдөг, шүүгч, прокурорыг нэг дор цуглуулж уулзалт зохион байгуулдаг. Энэ бол хууль, шүүхийн байгууллагын албан хаагчийн ёс зүйд нийцэхгүй. Энэ хүмүүс ямар нэгэн хэргийг хамтран төлөвлөөд гүйцэтгэдэг нь харагдаж байна” гэдгийг  ч УИХ-ын гишүүн  Ч.Ундрам онцолж байсан юм.