​ҮАБЗ-ийн Санхүүгийн албаны даргыг үндэслэлгүйгээр ажлаас нь халжээ

ҮАБЗ-ийн Санхүүгийн албаны дарга Ц.Сувдааг өвчтэй байх хойгуур нь ажлаас нь чөлөөлжээ.Тодруулбал, энэ сарын 14-ны өдөр ҮАБЗ-ийн ажлын албаны дарга Ч.Эрдэнэчимэг халах тушаалыг үйлдсэн байна. Ингэхдээ уг шийдвэрийг өөрт нь биечлэн танилцуулалгүйгээр гаргасан аж. Улмаар эзгүй хойгуур нь төрийн  маш нууцийн зэрэглэлтэй лацтай өрөөнд нь ажлын хэсгийнхэн хууль бусаар нэвтэрч орсон байна.

ҮАБЗ-ийн санхүүгийн албаны  даргаар ажиллаж байсан Ц.Сувдаагийн хувьд ҮАБЗ-д 2008 оноос хойш тасралтгүй ажилласан. Болсон явдлыг тодруулахаар түүнтэй холбогдоход тэрбээр “Намайг ямар ч үндэслэл шалтгаангүйгээр ажлаас халсан нь үнэн. Хуулиараа хоёр сарын өмнө ажлаас чөлөөлөх шийдвэрийг танилцуулах ёстой атал өвчтэй байх хойгуур яаран ийм шийдвэрийг гаргасан. Ямар зорилготойгоор намайг гэнэт халсан нь хардлага төрүүлж байна. Төрийн маш нууц санхүүгийн  баримтууд хадгалагдаж байдаг төрийн нууцлалтай  миний ажлын өрөөнд хүчээр хүртэл нэвтэрч орсон. Хэрэв төрийн нууц задарвал би хариуцлага үүрэхгүй гэдгийг хэлье” гэлээ.

Бидэнд олдсон мэдээллээр, ҮАБЗ-ийн Санхүүгийн албаны даргаар Х.Отгонжаргалыг томилно гэсэн мэдээлэл байна. Х.Отгонжаргалын хувьд энэ оны хоёрдугаар сард ҮАБЗ-д Төрийн нууц хариуцсан референтээр ажилд орж байжээ.