Хакерууд Америкийн компаниас 90 сая доллар авсан

АНУ дах шатахуун дамжуулах “Colonial Pipeline” хоолойны дэд бүтэц рүү дайралт хийж, ажиллагаагүй болгосон хакеруудын  “DarkSide” бүлэглэл нь тус компаниас 90 сая доллар сүрдүүлгээр авсан тухай “CNBC” суваг мэдээлсэн байна. Хоолойны үйл ажиллагааг гацааж мөнгө нэхсэн нийт есөн сарын хугацаанд 47 компани сүрдүүлэгд өртөж, ажиллагаагаа сэргээхийн тулд хакеруудад тус бүр ойролцоогоор 1,9 сая доллар төлсөн юм байна.  

Хакерууд мөнгөө биткоиноор авсан тул шилжүүлгүүдийн эцсийн хүлээн авагч хүртэл нарийвчлан хянаж чадаагүй гэж байна. CNBC 90 сая долларыг хакеруудын авсан мөнгөний доод хязгаар гэж тодорхойлжээ. Ийнхүү сүрдүүлэг явуулж, Америкийн түлшний зах зээлийн хямралд оруулсан “DarkSide” бүлэглэлийг Оросын нутагт байрладаг гэж таамаглаж байгаа учраас Цагаан ордны хэвлэлийн төлөөлөгч Жен Псаки нь хакеруудын дайралтад Москва тодорхой хэмжээний хариуцлага хүлээх ёстой гэж мэдэгдээд байсан юм.  

Дайралтад өртсөн “Colonial Pipeline” үйл ажиллагаагаа бүрэн сэргээсэн бол дайрсан хакеруудын “DarkSide” бүлэглэл тавдугаар сарын 15 –нд мэдэгдэл хийж, бүлгийн ажиллагаагаа сайн дураар татан буулгаж байгаагаа мэдэгдсэн байна.