Д.Сумъяабазар: Нийслэлийн иргэд өдөрт 2.5 цаг, жилд 35 өдрийг түгжрэлд өнгөрүүлж байна

Засгийн газрын өргөтгөсөн хуралдаан өнөөдөр /2021.05.19/ 10 цагт эхэллээ. Хуралдаанаар нийслэл Улаанбаатар хотын тулгамдсан асуудлыг нээлттэй хэлэлцэнэ. Тодруулбал, авто замын түгжрэл, орон сууцны дэд бүтэц, эрчим хүчний зэрэг нийслэлд тулгамдаж буй асуудлаар цогцоор нь анх удаа ийн хэлэлцэж байна. 

Нийслэлийн Засаг дарга Д.Сумъяабазар Нийслэл Улаанбаатар хотын тулгамдсан асуудлын талаар танилцуулж байна. Тэрбээр  "Нийслэлд хөдөлгөөнд оролцож байгаа тээврийн хэрэгслийн хөдөлгөөний хурд 13 км/цагийн хурдтай байна. Оргил ачааллын үед 8.9 км/цагийн хурдтайгаар оролцож байна.Дэлхийн стандарт 10 км/цагийг тэг зогсолт гэж үздэг. Гэтэл Улаанбаатар хотын хөдөлгөөн тэг зогсолтын хэмжээнд ирээд байна. Мөн Улаанбаатарын иргэд өдөрт 2.5 цаг, жилд 35 өдрийг түгжрэлд өнгөрүүлж байна" гэсэн судалгааг танилцууллаа. 

Хэлэлцэх асуудлын дараалал:

• Нийслэл Улаанбаатар хотын тулгамдсан асуудлын талаар,
• Нийслэл Улаанбаатар хотын авто замын түгжрэл, түүнийг шийдвэрлэх арга замын талаар (авто замын түгжрэл, Богдхан төмөр зам)
• Нийслэл Улаанбаатар хотын хот байгуулалтын талаар (орон сууц, цэвэрлэх байгууламж. усан хангамж, дагуул хот)
• Нийслэл Улаанбаатар хотын дулаан, Цахипгаан, эрчим хүчний дэд бүтцийн талаар
• Нийслэлийн эрх зүйн байдлын тухай хуулийн шинэчилсэн найруулгын төслийн талаар
• Нийслэл Улаанбаатар хотын талаар авах зарим арга хэмжээний тухай” Засгийн газрын тогтоолын төсөл
• Коронавируст халдвар /КОВИД-19/-ийн цар тахлын нөхцөл байдал, авч хэрэгжүүлж байгаа шуурхай хариу арга хэмжээний талаар        
• “Эрүүл мэндээ хамгаалж, эдийн засгаа сэргээх 10 их наяд цогц төлөвлөгөө"-ний хэрэгжилтийн талаар
• Улсын төсвийн хөрөнгө оруулалтаар хэрэгжиж байгаа бараа, ажил, үйлчилгээний худалдан авах ажиллагааны явцын талаар
• Ардын хувьсгалын 100 жилийн ойн хүндэт медаль бий болгох тухай УИХ-ын тогтоолын төсөл зэргийг хэлэлцэнэ.