Их долоогийн гишүүн орнуудыг нүүрсний цахилгаан станцуудаас бүрэн татгалзахыг уриална

 Их Британи нь удахгүй болох Их долоогийн уулзалтын үеэр нүүрсний цахилгаан станцуудаас аль болох хурдан татгалзахыг уриалах гэж байгаа тухай “Kyodo” агентлаг мэдээлж байна.

  Энэ тухай холбогдох заалтыг дээд түвшний уулзалтын дараах мэдэгдэлд тусгайлан оруулахыг Британи санал болгоод байгаа юм байна. Ингэж мэдэгдэлд оруулахын өмнөх хэлэлцүүлгийг энэ сарын 20-21-нд болох Их долоогийн байгаль орчны сайд нарын уулзалтаар явуулах аж. Их долоогийн гишүүдээс Их Британи, Герман, Итали, Канад, Франц гэсэн улсууд нь нүүрс олборлохоос татгалзах төлөвлөгөөтэй байгаагаа мэдэгдэж байсан. АНУ-ын Ерөнхийлөгч Байдены захиргаа ч энэ асуудалд нааштай хандаж байгаа аж. Харин Япон "Фукусима-1" цөмийн станц дээр гарсан ослын дараа цөмийн эрчим хүчнээс татгалзах тухай яригдаж байгаа үед нүүрсний цахилгаан станцуудаа бүгдийг ашиглалтаас гаргана гэдэг Японы хувьд тун бэрх зорилт болж хувираад байгаа.

  Японд одоогоор 140 нүүрсний цахилгаан станц ажиллаж байгаагаас 26 нь саяхан баригдсан ашигт үйлийн коэффицент өндөртэй, нүүрсхүчлийн ялгарал багатай хамгийн орчин үеийн станцууд юм. Иймд үлдсэн 114 станцаас 100 орчмыг нь бүрэн зогсоох төлөвлөгөөтэй байгаа юм байна. Окинава, Хоккайдо гэх мэт зарим мужуудад ч байгалийн гамшиг, онцгой байдалд нөөц болгож зарим нүүрсний цахилгаан станцуудыг үлдээх юм байна.

Их долоогийн уулзалт зургаадугаар сарын 11-13-ны өдрүүдэд Корнуолл хойгийн Кабрис-Бэй сувиллын хотхонд уламжлалт хэлбэрээр явагдана. Түүнд Их долоон гүрний төрийн тэргүүнүүдээс гадна Европын зөвлөлийн тэргүүн Шарль Мишель, Европын комиссын тэргүүн Урсула фон дер Ляйен, тусгайлан уригдсан Энэтхэг, Өмнөд Солонгос, Австралийн удирдагч нар оролцох юм.