Палестины энгийн иргэдийг хүчирхийллээс хамгаалах тусгай хүч байгуулахыг уриалав

Туркийн Гадаад хэргийн сайд Мевлют Чавушоглу нь  Палестины энгийн иргэдийг хүчирхийллээс хамгаалах олон улсын тусгай хүч байгуулахыг уриалсан байна. Тэрээр Исламын хамтын ажиллагааны байгууллагын Гадаад хэргийн сайд нарын хуралдаан дээр үг хэлэхдээ “Олон улсын хамтын нийгэмлэг нь Палестины энгийн иргэдийн аюулгүй байдлыг хамгаалах хариуцлагыг хүлээж байгаа. Энэ хариуцлагын чухал хэсэг нь Исламын хамтын ажиллагааны байгууллагад ногдож байгаа юм. Бид 2018 оны зургаадугаар сард батлагдсан НҮБ-ын Ерөнхий Ассамблейн тогтоолын дагуу Палестины энгийн иргэдийг хамгаалах олон улсын тогтолцоо байгуулахаар ажиллах ёстой. Энэ санаачилга нь дэмжигч орнуудын зүгээс цэргийн болон санхүүгийн дэмжлэг авдаг олон улсын хүч байгуулах замаар хувь хүмүүсийг хүчирхийллээс хамгаалахад оршино” гэжээ. Өөрөөр хэлбэл мөргөлдөөнтэй бүс нутаг НҮБ-ын Энхийг сахиулагчидтай адил эрх бүхий исламын шашинд оруудын олон улсын цэргийн хүч оруулахыг санал болгосон байна.

  Тавдугаар сарын 10-аас хойш өрнөж байгаа мөргөлдөөний улмаас Палестины 181 хүн амь насаа алдаад байгаагаас 52 насанд хүрээгүйчүүл, 31 эмэгтэй байгаа бөгөөд шархадсан хүний тоо 1125 –д хүрээд байгаа аж.

Чавушоглугийн энэхүү санаачилгын өмнө Туркийн Ерөнхийлөгч Эрдоган Ураза-Байрамын тохиолдуулан исламын сүсэгтэн олонд хандан үг хэлэхдээ “Бид Израйл нэртэй алан хядагч улсын дарангуйлалд уурлан хилэгнэж байна. Тэд бүх хэмжээ хязгаарыг давж гарлаа. Тэднийг зогсоох нь хүн төрөлхтний үүрэг” гээд Турк улс нь Уулын Карабахын эзлэгдсэн газар нутгийг чөлөөлөхөд Азербайжанд тусалж байсантай адилаар Иерусалим дах палестинчүүдын үйл хэргийг эрс шийдэмгий тэмцэнэ гэж мэдэгдээд байсан юм.

Гэвч шинжээчид Израйль бол Армени биш болохоор Турк нь Уулан Карабахад байсан шиг дураараа дургиж чадахгүй гэдгийг онцолсон байна.