Ираны эргийн хамгаалалтын завинууд Америкийн цөмийн шумбагчийг бүслэх гэж оролджээ

Америкийн хэвлэлүүд Ормузын хоолойн орчим Ираны эргийн хамгаалалтын хурдны завинууд  Америкийн “Жоржиа” цөмийн шумбагчийг бүслэх гэж оролдсон тухай “Forbes” мэдээлжээ. Цөмийн шумбагч нь эргүүлийн “USS Thunderbolt”, “USS Squall” усан онгоц, крейсерангиллын “USS Monterey” усан онгоц зэрэг бусад зургаан хөлгийн хамт Ормузын хоолойгоор гарах үед оролдлого хийгдсэн байна. Шумбагч онгоц хамгаалалт дунд ил явж байхад нь Ираны хурдны 13 завь гэнэт довтолж, бүслэхийг завджээ. Ийм үед бусад зургаан онгоцноос анхааруулах буудлага хийсний дараа л Ираны завинууд аюулгүй зайнд ухарсан гэж байна. Америкчууд Ормузынхоолойг Ираны  завинууд бусад улсын усан онгоц руу гэнэтийн дайралт хийхэд хамгийн тохиромжтой газар гэж үздэг.

Америкийн зэвсэгт хүчний хэвлэлийн албаны Жон Кирбиэнэ тохиолдлын дараагаар мэдэгдэл хийхдээ “Ираны завинууд аюулгүй бус бөгөөд мэргэжлийн бус маневр хийж, усан онгоцны аюулгүй байдлын дүрмүүдийг үл мөрдөж, АНУ-ын байлдааны усан онгоцнуудад аюул учруулсан” гэж мэдэгджээ. Дашрамд сонирхуулахад Ормузын хоолойноос Ираны нийслэл хүртэл 700 км бол бүслэгдэх шахсан “Жоржиа” цөмийн шумбагч нь 2500 км тусгалтай “Томагавк”  далавчит пуужин тээдэг юм байна.