Энэтхэгт COVID-оос болж нас барсан иргэдээ чандарлаж дийлэхгүй байна

Энэтэхгт COVID-19-ийн халдвар газар авахыг дагаад нас барагчдын тоо ч огцом өсөж, үүнээс болж цогцос чандарлах хөлс ч огцом өссөн байна.  Үүнээс болж ядуус корона вирусээр нас барсан төрөл садны хүмүүсээ уламжлалын дагуу чандарлаж дийлэхгүй болсон байна. Улмаар тэд цогцсыг шууд голд хаяж урсгах болсон тухай орон нутгийн хэвлэлүүд мэдээлж анхааруулсан байна.

Тухайлбал, Бихар мужийн албаны хүмүүс Ганц мөрнөөс 71 цогцос гаргаж авсан бол урсгалаар дээгүүр байрлалтай Уттар-Прадеш мужийн албаныхан голоос 25 чандарлаагүй цогцос гаргаж авсан байна. Иймд Ганга мөрний дагуу мужуудын удирдлагаас иймэрхүү үйлдэл хийвэл хуулийн хариуцлага тооцохыг анхааруулсан мэдэгдэл тараасан байна. Түүнчлэн Засгийн газар нь Жал-Самадхи уламжлалыг мөрдөхийг түр зогсоох тухай тушаал баталсан аж. Энэхүү Жал-Самадхи уламжлалын дагуу цогцсыг чандарласны дараа үлдсэнийг сайн төрөл олохыг ерөөн гол урсгадаг ёстой юм байна. Харин ядуус чандарлах хангалтай түлээ, түлш авч чадахгүй болохоор шатаалгүйгээр урсгаж эхэлснээс таагүй байдал үүсээд байгаа бололтой.

Энэтхэгт корона вирусийн халдвар авсан хүний тоо 22 саяыг даваад байгаа юм. Байдал тун ноцтой байгаа тул ОХУ, АНУ, Их Британи зэрэг их гүрнүүд Энэтхэгт яаралтай хүмүүнлэгийн тусламж үзүүлж эхэлсэн төдийгүй дөнгөж саяхан дайтах дээрээ тулаад байсан БНХАУ хүртэл хиймэл амьсгалын аппарат нийлүүлэн тусламж үзүүлсэн байна.