ЭМЯ:Вакцин хийлгээд амиа алдсан гэх эмэгтэйн Шүүх шинжилгээний үндэсний хүрээлэнгээс ирэх хариуг хүлээж байна

Энэ сарын 09-ны өдөр БНХАУ-ын Синофармын Вероселл вакциныг хийлгэсэн 44 настай эмэгтэй амиа алдсан мэдээлиийг бид ар гэрийнхэнээс нь авч хүргэсэн. Тухайн эмэгтэй нэг сар 10 хоногийн өмнө төрсөн нялх хүүхэдтэй эмэгтэй байсан юм. Тэгвэл энэ асуудлаар ЭМЯ, ХӨСҮТ-ээс тайлбар хийжээ.

ЭМЯ-ны хэвлэлийн төлөөлөгч Б.Ууганбаяр: Шүүх шинжилгээний үндэсний хүрээлэн нас барсан хүмүүсийн шалтгааныг эцэслэн тогтоодог. Үүний дараагаар Эрүүл мэндийн яамнаас тодорхой
мэдээлэл өгөх болно.Бид одоогоор Шүүх шинжилгээний үндэсний хүрээлэнгээс ирэх шинжилгээний хариуг хүлээж байна.

ХӨСҮТ-ийн Дархлаажуулалтын албаны дарга О.Дашпагма: Вакцины дараа илэрч буй урвалыг богино хугацаанд болоод ерөнхий биеийн, хэсэг газрын урвал гэж ангилдаг. Богино хугацаанд илрэх урвал буюу амь насанд аюултай байх урвал вакцин хийлгэснээс хойш 30 минутын хугацаанд илэрдэг. Аливаа вакцин хийсний дараа эмчийн хяналтад 30 минут байлгадаг нь нас баралтад хүргэхээр урвал эхний 30 минутад л илэрдэгтэй холбоотой гэж ойлгож болно гэв.

Харин талийгаачийн ар гэрийнхэн нь талийгаачийг ямар нэг хууч өвчингүй, даралт нь ихэсдэг байсан ч вакцин хийхдээ даралтыг нь үзээгүй байсан гэх мэдээллийг өгч байгаа юм.