Талийгаачийн охин Н: Вакцин хийхдээ ээжийн даралтыг үзээгүй гэсэн,ээж маань вакцин хийлгээд амиа алдчихлаа

Энэ сарын 09-ны өдөр БНХАУ-ын Синофармын Вероселл вакциныг хийлгэсэн 44 настай эмэгтэй 10-ны өдөр амиа алдсан мэдээлиийг бид ар гэрийнхэнээс нь тодрууллаа.

Талийгаачийн охин н.Нандиндулам: Тавдугаар сарын 09-ны өглөө 10-11 цагийн хооронд манай дүүг надад үлдээгээд ээж нь вакцинаа хийлгээд ирье гээд яваад ирсэн. Надад вакцин хийлгэж болох үгүйг мэдэхгүй байна. Юу ч гэсэн очиж асуугаад болно гэвэл хийлгэчихье гээд явсан. Ирэхдээ вакцин хийлгэчихээд ирсэн. Эмчээс нь асуутал болно гэхээр хийлгэчихлээ, гайгүй юм шиг байна гээд хэлж байсан. Гэртэй ойрхон газарт вакцин хийлгэсэн. Тэгээд 10-ны оройн 21 цаг 45 минутын үед нойл орох гэж гараад, удаад эргэж ирээгүй. Удаад байхад нь гартал амьсгалахгүй байсан. Вакцинаа хийлгээрэй гээд уриалаад байхаар нь ээж хийлгээд ирье гээд явсан. Гэхдээ Хятадын Вероселл үйлдвэрээс зөвлөхдөө жирэмсэн болон жирэмслэхээр төлөвлөж байгаа, хөхүүл эмэгтэйчүүдэд вакцин хийлгэж болохгүй гэдэг зөвлөмж гаргасан. Манай ээж нэг сарын 10 хоногийн өмнө манай отгон дүүг гаргасан. Нялх биетэй байсан. Эмчийн магадлагаан дээрээ ямар нэгэн өвчин байхгүй, даралт өндөр байна гэж бичсэн байна. Даралтынхаа эмийг ууж байсан. Эмч нь вакцин хийхдээ ээжийн даралтыг үзээгүй юм билээ. Би эхээс дөрвүүлээ дээрээ нэг ахтай, найман настай охин дүүтэй, нэг сартай дүүтэйгээ үлдээд байна. Аав маань төрийн албанд ажилладаг. Одоогоор холбоотой байгууллагууд холбогдоогүй байна. Вакцин хийлгээд нас барчихаад байхад яагаад чимээгүй байгаад байгаа юм бэ. Олон хүн амиа алдаад байх, чимээгүй байгаад байвал дахиад олон хүн нас барвал яах юм бэ.