Б.Жавхлан: НДШ-ийг хоёр хувиар нэмэх асуудлыг хойшлуулахыг ЗГ дэмжинэ гэдгийг хэлсэн

Монгол Улсын Ерөнхий сайд Л.Оюун-Эрдэнэ, Сангийн сайд Б.Жавхлан нар өнөөдөр бизнес эрхлэгчдийн төлөөллийг хүлээн авч уулзсан. Эдийн засаг, нийгмийн өнөөгийн нөхцөл байдал, хийж байгаа ажлаа товч танилцуулж, төр, хувийн хэвшлийн түншлэлийн хүрээнд хэрхэн хамтрах талаар санал солилцсон юм. Энэ үеэр Сангийн сайд нийгмийн даатгалын шимтгэлийг долдугаар сарын 1-нээс хоёр хувиар нэмэх асуудалтай холбоотойгоор өөрийн байр сууриа илэрхийлсэн юм.

Ингэхдээ "Манай улс нийгмийн даатгалыг тэглэх, татварын өршөөл үзүүлэх ажлыг өмнө нь нэг удаа хийсэн.  Харин дахиж ийм зүйл хийх учиргүй. Харин цар тахлын үед иргэд, ААН-дэд тодорхой дэмжлэг үзүүлсэн. Өнгөрсөн онд 2.4, энэ онд 1.7 их наяд төгрөгийн өөрт ахадсан төсвийн ачааллыг авлаа. Манай улс Олон улсын валютийн сангийн өмнө хүлээсэн үүрэгтэй. Харин өнөөдөр яригдаж буй нийгмийн даатгалын шимтгэлийг нэмэх асуудал  2017 онд шийдэгдсэн ч 2020 онд үүнийг хойшлуулсан. Дахин хойшлуулах асуудлыг ярьж байгаа. Үүнийг Засгийн газар дэмжинэ гэж өчигдөр Ерөнхий сайд хэлсэн" хэмээн өөрийн байр сууриа илэрхийлсэн юм.