Ц.Нямдорж: С.Зоригийн хэргийн захиалагчаар Э.Бат-Үүлийг татсан

Ерөнхий сайд Л.Оюун-Эрдэнэ өнөөдөр 100 хоногт хийж хэрэгжүүлсэн ажлаа тайлагнаж, сэтгүүлчдийн асуултад хариулах үеэр манай сэтгүүлч Н.Өнөрцэцэг Хууль зүйн сайд асан,  ЗГХЭГ-ын дарга Ц.Нямдоржоос С.Зориг агсны амь насыг хөнөөсөн хэргийн захиалагчийг зарлах эсэхийг тодрууллаа.

Энэ асуудлаар ЗГХЭГ-ын дарга Ц.Нямдорж: 2016 онд С.Зоригийн хэргийг мөрдөж, шалгасан хүмүүс захиалагчийг тогтоож чадаагүй байж, захиалгаар хүн алсан гээд Б.Содномдаржаа, Т.Чимгээ нарт ял оноосон. Би хэдхэн хоногийн өмнө Өдрийн сонинд  Хонгил үүссэн түүх ба яргын хэрэг нийтлэл бичсэн. Энэ нийтлэл дотор бүх зүйлийг бичсэн байгаа. 2016 онд Ц.Амгаланбаатарын мэдүүлгээр энэ хэргийн захиалагчаар Э.Бат-Үүлийг татсан. Нотлогдож байгаа тул гэх үгтэйгээр татсан ч 20 хоногийн дараа нотлогдоогүй тул гээд яллагдагчаар татсан тогтоолыг хүчингүй болгосон. Хамжигчаар нь Б.Булганыг татаж арван сар хорьсон ч тогтоож чадаагүй гээд сулласан. Ц.Амгаланбаатар 2014 оноос хойш Э.Бат-Үүлийн талаар ярьсан. Харин Э.Бат-Үүлээс байцаалт авах ёстой байтал ямар ч байцаалт аваагүй. Ийм учир би энэ хэрэгт хүн хэлмэгдсэн гэж тууштай үзэж байгаа юм. Үүнд ямар ч эргэлзээ байхгүй.