​ Бразилийн Ерөнхийлөгч өөрийгөө Путинтэй төстэй гэжээ

Бразилийн Ерөнхийлөгч Жаир Болсонару сэтгүүлчидтэй уулзах үеэрээ өөрийгөө Оросын Ерөнхийлөгч Путинтэй их төстэй, Оросыг маш ихээр сонирхдог гэж ярьсан байна. Орос руу хар тамхи зөөсөн хэргээр хоёр жилийн өмнө баривчлагдаад Болсонаругийн хувийн хүсэлтээр Путин чөлөөлж нутаг буцаасан хөлбөмбөгчин Робсон Оливейраг нисэх буудал дээр биечлэн угтан авах үеэр ийм мэдэгдэл хийжээ. Болсонару “Путин бид хоёр их төстэй. Би үүнийг хэзээ ч үгүйсгэж байгаагүй. Энэ улс бидний сонирхлыг маш ихээр татаж байна” гэжээ.

Москвагийн “Спартак” багт тоглож байсан Оливейраг 2019 онд Орост хориотой метадоны гидрохлорид нэртэй эм оруулж ирэхийг завдсан хэргээр хил дээр саатуул урьдчилсан хорих төвд хориод байсан аж. Оливейра нь хадамдаа зориулж эмийн сангаас жорын дагуу эм авсан гэж нотолж байсан ч Оросын хуулиар 20 жил хүртэл хоригдох ял авч магадгүй байсан. Ийм нөхцөлд Болсонору нь тамирчнаа суллуулахын тулд Ерөнхийлөгч Путинд шууд хандана гэж мэдэгдэж байсан юм. Тэрээр “Бразилд эмчийн жороор эмийн сангаас авч болдог эм нь Орост хар тамхи гэж тооцогддогийг Оливейра төсөөлөө ч үгүй байсан тул энэ хүн бидний хувьд ямар ч гэмгүй” гэж мэдэгдэж байсан аж.