ЭСЯ:Спутник V вакцины нийлүүлэлттэй холбоотой улс төрийн шинжтэй ямар нэг саад тотгор байхгүй

Коронавируст халдварын эсрэг үйлчлэл тогтоох шинж чанараараа дэлхийн олон оронд хүлээн зөвшөөрөгдөж бүртгэгдээд байгаа “Спутник V” вакциныг манай Эрүүл мэндийн яам хэрэглэхийг зөвшөөрсөн шийдвэр гаргаснаас хойш Монголын талын эрх бүхий байгууллагууд ОХУ-ын төр, засгийн байгууллагууд, ОХУ-ын Шууд хөрөнгө оруулалтын сантай байнгын холбоотой ажиллаж, уг вакцины 1 сая тунг худалдан авч Монголд нийлүүлэх тухай Монгол Улсын Эрүүл мэндийн яам, Оросын Шууд хөрөнгө оруулалтын сантай гэрээ байгуулан, энэ тохиролцооны дагуу эхний ээлжийн 20000 тун вакцин, манай холбогдох аж ахуйн нэгжтэй байгуулсан гэрээний дагуу мөн 20000 тун вакцин 4 дүгээр сарын 30-ны өдөр ачигдсан болно.

Энэхүү тохиролцооны дагуу талууд дараачийн ээлжийн нийлүүлэлтийн хуваарийг харилцан зөвшилцөж байгаа бөгөөд гэрээг тасалдуулах гэсэн ямарваа нэг санаатай болон санамсаргүй үйлдэл хэлэлцэн тохирогч аль ч талаас гаргаагүй болохыг хариуцлагатайгаар мэдэгдэж байна.

Монгол Улсын Ерөнхийлөгч Х.Баттулга ОХУ-ын Ерөнхийлөгч В.В.Путинтэй утсаар ярихдаа, Монгол Улсын Ерөнхий сайд Л.Оюун-Эрдэнэ ОХУ-ын Засгийн газрын дарга М.В.Мишустинд хандсан албан захидалдаа “Спутник V” вакцины нийлүүлэлтийг түргэвчлэх талаар тусгайлан хүсэлт тавьж, манай талын хүсэлтийг ОХУ-ын төр, засгийн удирдлагын түвшинд ойлгон хүлээн авсан болно.

Иймд “Спутник V” вакцины нийлүүлэлттэй холбоотой улс төрийн шинжтэй ямар нэг саад тотгор байхгүй бөгөөд уг вакцины өндөр эрэлт, үйлдвэрлэлийн боломжтой холбоотой техникийн түр зуурын бэрхшээл гарч байгааг Монголын олон нийт ойлгож байгаа гэж найдаж байна.

“Спутник V” вакцин худалдах, худалдан авах хоёр талын гэрээний биелэлтийг хангуулахад манай Элчин сайдын яам өдөр тутам анхаарч, өөрөөс шалтгаалах бүх талын арга хэмжээг авч, үүргийн дагуу Төвийг мэдээллээр тухай бүр ханган ажиллаж байгааг сонордуулъя.

Монгол Улсаас ОХУ-д суугаа Элчин сайдын яам