Г.Батбаатар: Шүлснээс ковидын халдвар илрүүлэх оношлуур нь хамар залгиурын оношлуураас 50 хувь хямд өртөгтэй, халдвар авсан нэн эрт үед илрүүлэх чадвартай

АШУҮИС-ийн дэд захирал Г.Батбаатар:  Шадар сайд, ЭМ-ийн сайдын хамтарсан тушаалаар хамар залгиурын PCR оношлуурын өртөг 82157 төгрөг гэж гарсан байдаг. Яг оношлуур нь дангаараа 56 мянган төгрөг юм шиг байгаа юм. Бусад өртөгтэйгөө нийлээд 82 мянган төгрөг. Харин шүлснээс халдвар илрүүлдэг PCR оношлуур нь бүх зардал ороод 31200 төгрөг. Манайх 50 хувийн хямд үнэтэй байгаа юм. Хүмүүс зарим оношлуурыг сайн ойлгохгүй байх шиг байгаа юм. Түргэвчилсэн оношлуурыг мөн л хамар залгиурт хийж шинжилгээ авч байгаа. Энэ бол 15 минутын дотор хариу нь гардаг оношлуур. Хамгийн багаар бодоход 100 мянган вирусын хуулбар байхад илрүүлдэг оношлуур. Мэдрэг чанар жаахан муутай. Тийм учраас энэ оношлуурыг өргөн дэлгэр хэрэглэхийг ДЭМБ-аас зөвлөдөггүй юм. Одоо манайд хэрэглээд байгаа Хятад, Солонгос PCR оношлуурууд нь 100-500 вирусын хуулбар байхад илрүүлэх мэдрэг чадвартай. Харин шүлснээс халдвар илрүүлэх оношлуур нь 12-24 вирусын хуулбар байхад илрүүлж чадна гэдэг нь судалгаагаар гарсан. Тэгэхээр халдвар авсны нэн эрт үед буюу халдвар авсан өдөр эсвэл маргааш нь илрүүлэх бололцоотой оношлуур. Шүлснээс халдвар илрүүлэх оношлуур бол түргэвчилсэн оношлуур биш.