Тод манлай уяач Д.Даваахүү хулгайн замаар Дорнод аймагт зорчин, түргэвчилсэн оношлуураар батлагдан тусгаарлагджээ

2021 оны дөрөвдүгээр сарын 09-ний өдөр Улаанбаатар хотын харьяат иргэн, тод манлай уяач Д.Даваахүү Хэнтий аймгийн ковидын халдвар батлагдсан тохиолдлын ойрын буюу нэгдүгээр хавьтал болсон атал баталгаат бус замаар зорчин Цагаан-Овоо сумын нутгаас отроор Батхаан багийн нутаг дэвсгэрт 2-3 малчин өрхөөр оржээ. Ингэхдээ "Хангарьд" дэлгүүр, авто засвар, "Шунхлай" ШТС, үсчин зэрэг газраар үйлчлүүлсэн байна. 

Тод манлай уяач Д.Даваахүүгээс яаралтай ковид-19 түргэвчилсэн оношлуулаар шинжилгээ авахад "эерэг" хариу гарч, яаралтай аймгийн Халдварын тасаг руу тусгаарлалтад хүргүүлсэн байна. 

Дорнод аймгийн Цагаан-Овоо сумын хэмжээнд хавьтлыг илрүүлэх ажил явагдаж байгаа учир өнөөдөр /2021.04.11/ өглөөний 05:00 цагийн Сумын онцгой комиссын хуралдааны шийдвэрээр дөрөвдүгээр сарын 18-ний өглөөний 06:00 цаг хүртэл долоо хоногийн хугацаанд сумын хэмжээнд "Тэг зогсолт" хийхээр болсон байна гэж Дорнод аймгийн "Цагаан-Овоо сумын онцгой комисс"-оос мэдээллээ.