Дуучин Б.Батчулуун, С.Сэрчмаа нарын хүчирхийллийн тухай ярьсан бичлэг олон нийтийг бухимдуулав

Өнөөдөр нийгмийн сүлжээнд дуучин Б.Батчулуун, С.Сэрчмаа нарын хүчирхийллийн тухай ярьсан бичлэг цацагдаж, тэднийг ёс зүйгүй үйлдэл гаргасан хэмээн олон нийт шүүмжилж байгаа  юм. Нийгмийг соён гэгээрүүлэх учиртай урлаг, соёлын нэр бүхий хүмүүс бусдын хүчирхийлэл үйлдсэн тухайг олон нийтийн сүлжээгээр ярьж, инээж байгаа нь ийнхүү иргэдийг бухимдуулж байгаа юм. 

Уг бичлэгт дуучин Б.Батчулуун онигоо хэмээн тодотгож нэгэн найздаа тохиолдсон явдлыг ярьдаг. Ингэхдээ найз нь нэгэн бүсгүйд санаатайгаар согтууруулах ундаа өгч, бэлгийн дарамт үзүүлсэн тухайг ярьж, инээлддэг юм.  

Уг ярианд гарч байгаа үйлдэл нь МУ-ын Эрүүгийн тухай хуулийн 12.1 дэх хэсэгт заасан зүйл ангийг зөрчиж байгаа учир энэ хэрэгт хуулийн байгууллага анхаарлаа хандуулж шалгах нь зүйтэй гэж үзэх иргэд ч мөн байгаа юм. 

Уг үйл явдлаас үүдэн 25 дугаар суваг телевиз мэдэгдэл гаргасан байна. Мөн "Капитрон банк"-ны маркетингийн захирал өөрийн цахим хуудаснаа үзэл бодлоо ийнхүү илэрхийлсэн байна. Энэ нь ёс зүйгүй үйлдэл гаргасан олны танил хүмүүсийг нийгмээрээ шүүмжилж, эрүүл нийгмийг бүтээх иргэдийн оролцоо, хандлага чухал хэмээн олон нийт үзэж, дэмжиж байгаа аж.