ХХЕГ: Амиа алдсан алба хаагч эхнэр гурван хүүхдийн хамт амьдардаг байсан

Говь-Алтай аймагт хоёр цэрэг харуулын даргаа буудаж хөнөөсөн асуудлаар ХХЕГ-аас тайлбар өгч байна.
Хил хамгаалах ерөнхий газрийн захиргааны удирдлага эрхэлсэн дэд дарга хошууч генерал Ш.Лхачинжав: " Говь-Алтай аймгийн Алтай суманд байрлах Хилийн цэргийн 0214-р ангийн дөрөвдүгээр заставын харуул дээр өнгөрсөн өдөр буюу дөрөвдүгээр сарын 8-ны өдрийн 18:00 цагт Монгол улсын хилийн манаанд үүрэг гүйцэтгэж байсан байлдагч Х, М нарын бүрэлдэхүүнтэй  манаанд үүрэг гүйцэтгээд хилийн харуул дээр ирэх явцад хэрэг гарсан. Харуулын дарга манаагаа тосч авч буу шалгаж байрлуулдаг журамтай. Ингээд байрлуулах үед манааны бүрэлдэхүүн урдаас нь зэвсэг хэрэглэж харуулын даргын амь насыг хөнөөгөөд харуулын байрыг орхиод явсан мэдээллийг авсан. Говь Алтай аймгийн цагдаа болон тагнуулын байгууллага ангийн бүрэлдэхүүнтэй ажиллаж хоёр цэргийн араас мөрдөж байна. Ангиас 50 орчим км-т Хонхор гэдэг газарт мотоциклоо орхиод цааш явсан мөрийг илрүүлээд мөшгөж байна. Харуул дээр хоёр цэргийн алба хаагч үлдсэн. Энэ дөрвөн алба хаагч нь өнгөрсөн оны аравдугаар сард татагдсан цэргүүд бөгөөд манаанд явж ирсэн хоёр цэрэг ийм үйлдлийг хийсэн гэсэн мэдээлэл өгсөн. Үлдсэн хоёр цэргийн мэдээлснээр ямар нэг дарамт шахалт байгаагүй. Харуулын дарга харин ч цэргүүдтэй хүнлэг харьцдаг байсан гэсэн.Амиа алдсан алба хаагч эхнэр гурван хүүхдийн хамт амьдардаг байсан. Оргосон хоёр цэргийн нэг нь Ховд аймгийн Чандмань сумын харьяат Х, нөгөө нь Орхон аймгийн Баян-Өндөр сумын харьяат М нар юм. Алтай сумын М гэдэг айлд ороод мотоциклыг нь гуйж аваад идэж уух юм аваад явсан байна" гэв.