ЗХЖШ: Талийгаачийн ар гэрт таван жилийн цалин хөлстэй тэнцэх нэг удаагийн тэтгэлэг болон оршуулгын зардлыг олгоно

Зэвсэгт хүчний 326 дугаар ангид энэ сарын 28-ны өдрийн 22.45 минутад тус ангид алба хааж байсан 20 настай байлдагч Б даргадаа зодуулан хүнд гэмтлийн улмаас Төрийн тусгай албан хаагчдын нэгдсэн эмнэлгийн сэхээн амьдруулах тасагт хүргэгдээд байсан.

Тухайн байлдагч өнгөрсөн шөнө харамсалтайгаар нас баржээ. Талийгаач өнгөрөгч оны хоёрдугаар ээлжийн цэрэг татлагаар Хуурай замын цэргийн командлалын харьяа Зэвсэгт хүчний 326 дугаар ангид татагдан очиж алба хааж байсан юм.

Энэ хэргийг ЦЕГ-аас тодруулахад ЦЕГ-ын хэвлэл мэдээллийн төвийн ахлах мэргэжилтэн О.Эрдэнэхишиг: Зэвсэгт хүчний 326 дугаар ангид энэ сарын 28-нд 24 настай салаан захирагч дэслэгч "Г" нь архи согтууруулах ундаа хэрэглэсэн үедээ амь хохирогч байлдагч "Б"-ийн биед халдсан байж болзошгүй нь урьдчилсан байдлаар тогтоогдсон. Тиймээс тус салаан захирагчид цагдан хорих таслан сэргийлэх арга хэмжээ авч, хэрэгт холбогдуулан шалгаж байна. Энэхүү хэргийг ХУД-ийн цагдаагийн 2-р хэлтэст шалгаж байна гэх мэдээллийг өгсөн.

Тэгвэл Зэвсэгт хүчний 326-р ангийн захирагч хурандаа Б.Батболдыг ажлаас нь чөлөөлжээ. Түүний оронд хурандаа Н.Отгонбаярыг тус ангийн захирагчаар томилсон байна. Тус ангид өнөөдөр ЗХЖШ-аас албаныхан ажиллаж байгаа юм байна.  ЗХЖШ-аас энэхүү хэрэгтэй холбоотой мэдээллийг хийлээ.

Энэ үеэр ЗХЖШ-ын Ажиллагааны удирдлагын газрын дарга, бригадын генерал С.Дашзэвэг: Цаашид ийм зүйл гаргахгүйн тулд Хуурай замын цэргийн ангийн бусад албан тушаалтнуудыг шалгаж, цэргийн алба хаагчдад ёс зүйн сургалт оруулна.Байлдагч "Б"-г нас барсан үндэслэлээр хуулийн дагуу ар гэрт нь таван жилийн цалин хөлстэй тэнцэх хэмжээний нэг удаагийн тэтгэлэг болон оршуулгын зардлыг ЗХЖШ-аас өгнө гэх зүйлийг ярив.