ЦЕГ: Байлдагч амиа алдсан хэрэгт салаан захирагчид цагдан хорих арга хэмжээ авч, хэрэгт холбогдуулан шалгаж байна

 Зэвсэгт хүчний 326 дугаар ангид энэ сарын 28-ны өдрийн 22.45 минутад тус ангид алба хааж байсан 20 настай байлдагч Б даргадаа зодуулан хүнд гэмтлийн улмаас Төрийн тусгай албан хаагчдын нэгдсэн эмнэлгийн сэхээн амьдруулах тасагт хүргэгдээд байсан.

Тухайн байлдагч өнгөрсөн шөнө харамсалтайгаар нас баржээ. Талийгаач өнгөрөгч оны хоёрдугаар ээлжийн цэрэг татлагаар Хуурай замын цэргийн командлалын харьяа Зэвсэгт хүчний 326 дугаар ангид татагдан очиж алба хааж байсан юм.

Тэгвэл энэ хэргийн ЦЕГ-аас тодрууллаа.

ЦЕГ-ын хэвлэл мэдээллийн төвийн ахлах мэргэжилтэн О.Эрдэнэхишиг:  Зэвсэгт хүчний 326 дугаар ангид энэ сарын 28-нд  24 настай салаан  захирагч дэслэгч  "Г" нь архи согтууруулах ундаа хэрэглэсэн үедээ амь хохирогч байлдагч "Б"-ийн  биед халдсан байж болзошгүй нь урьдчилсан байдлаар тогтоогдсон. Тиймээс тус салаан захирагчид цагдан хорих таслан сэргийлэх арга хэмжээ авч, хэрэгт холбогдуулан  шалгаж байна. Энэхүү хэргийг ХУД-ийн цагдаагийн 2-р хэлтэст  шалгаж байна гэх мэдээллийг өглөө.