Өнөөдөр УОК хуралдаж хөл хорио тогтоох эсэхийг шийднэ

МУ-ын Ерөнхий сайд Л.Оюун-Эрдэнэ өнөөдөр /2021.03.22/ Төрийн ордонд Дархлаажуулалтын ажлын хэсэгтэй хуралдаж байна. 

Энэ үеэр Ерөнхий сайд Л.Оюун-Эрдэнэ УОК, НОК-ыг өнөөдөр хуралдуулах үүрэг өгсөн байна. Ингэхдээ "Шийдвэр гаргахдаа эрүүл мэнд, эдийн засаг, вакцинжуулалтын нийлүүлэлтийг түргэсгэх, иргэдээс мэдээлэл нуухгүй, хөл хорио тогтоох бол эрт мэдээлэх хэрэгтэй" гэдгийг тодотгожээ. 

Өнөөдрийн байдлаар нийслэлийн хэмжээнд 200 мянга гаруй хүн коронавирусийн эсрэг вакцины эхний тунг хийлгээд байна. Гэсэн ч манай улсад өнөөдөр анх удаа хоногт батлагдсан тохиолдлын тоо 200 давлаа. 

Тэгвэл Ерөнхий сайдын өгсөн чиглэлийн дагуу өнөөдөр Шадар сайд С.Амарсайханаар ахлуулсан Улсын Онцгой комисс хөл хорио тогтоох эсэх асуудлаар хуралдахаар болжээ. Одоогоор хэдэн цагаас хуралдах нь тодорхойгүй байна. Энэ талаар эргэн мэдээлэх болно.