Хөвсгөл: Цэцэрлэг суманд халдвар авсан иргэдийг 20 километр зайд машинаар тууж эмнэлэгт хүргэжээ

Хөвсгөл аймгийн Цэцэрлэг суманд коронавирусын тохиолдлууд нэмэгдэж бүртгэгдсээр байгаа юм. Цэцэрлэг суманд халдвар авсан иргэн, сэжигтэй тохиолдлын хоёр иргэнийг сумын эмнэлэгт тусгаарлах явцдаа 20 километр зайд алхуулж араас нь цагдаагийн машинтай туусан талаар сэжигтэй тохиолдлоор тус сумын эмнэлэгт очсон 38 настай иргэн Ц.Отгонбаяр манай сайтад хандлаа.

Сайн байна уу? Болсон явдлыг эхнээс нь бидэнд ярьж өгөхгүй юу?

-Сайн сайн байна уу? Миний хувьд Цэцэрлэг сумаас 50 километр зайд байрлах "Шаварын гол" гэдэг газар нөхөр, таван настай хүүхдийнхээ хамт  мал маллаж амьдардаг, малчин эмэгтэй. Манайх нүүх болоод хүн хүч муутай болохоор сумын төвд байдаг Ш гэдэг найзаараа туслуулахаар ирүүлээд байсан юм. Гэтэл найзын маань шинжилгээний хариу  эерэг гарсан гэдгийг сонссон. Манай гэр бүлийнхэнээс  шинжилгээ авч, миний түргэвчилсэн шинжилгээний хариу эерэг гарсан юм шиг байна лээ. Тэгээд манайд ирсэн найз Ш бид хоёрыг эмнэлгээс яриад сумын эмнэлэгт тусгаарлахаар болсон гэдгээ утсаар хэлсэн.

Танай найз, та хоёрыг эмнэлэг рүү авч, явж тусгаарлахдаа  хэрхэн тусгаарласан бэ?

-Яг л мал тууж байгаа юм шиг хандсан. Эмнэлгээс яриад бид нар хол газар луу явах боломжгүй, өөрсдөө машинтай ир гэсэн. Манай нөхрийн машин асахгүй, нөхрийн мотоциклоор бид гурав даваа хүртэл яваад нөхөр маань буцсан. Сандарч таван настай хүүхдээ гэртээ үлдээчихсэн байсан учир нөхрөө гэр лүүгээ буцаасан. Харин сумын төвөөс эмнэлгийн пургон, цагдаагийн жийптэй ирсэн. Биднийг суулгах боломжгүй гээд араас цагдаагийн машин нь дагаад, бид хоёрыг хонь мал тууж байгаа мэт цонхоороо жаахан хурдан яваарай гээд алхуулсан.

Та хоёр тухайн хүмүүсээс шаардаж үзсэн үү?

-Эмнэлгийн хүмүүсээс нь шаардахаар уурласан. Өөрсдөө суухгүй алхаад явна гэсэн гэж хүмүүст хэлсэн байсан. Тухайн үед Эмнэлгийн машин нь түрүүлж яваад, цагдаагийн машинд нь хоёр хүн сууж явсан.  Нэг нь цагдаа, нэг нь жолооч нь юм шиг байсан. Үнэхээр их гомдож байна. Миний PCR шинжилгээний хариу орой гарна. Би батлагдсан тохиолдол биш. 

Эмнэлгийн машин нь та хоёрыг суулгах гэж очоогүй юм уу? 

-Мэдэхгүй, дотор нь цагаан өнгийн зориулалтын хувцсаа өмссөн хүмүүс байсан. Эмчийг нь танихгүй юм билээ. Мөрөнгөөс ирсэн эмч гэсэн. Биднийг алхуулах гээд цагдаагийн машинд даатгаж үлдээгээд сумын төв рүү эмнэлгийн пургонтойгоо түрүүлээд явчихсан. 

Хэдэн цаг тийм байдалтай алхсан бэ? 

-Бараг хоёроос гурван цаг алхсан. Толгой, хөл өвдөөд ядарсан ч араас машин явж байгаа болохоор амрах эрхгүй явсан.  

-Та хоёр цагдаад нь ядраад байна,амраад явъя гэж хэлж үзсэн үү? Юу гэж хэлсэн бэ?

-Хэлээгүй, суулгахгүй юм байхдаа гэж дотроо бодож маш их гомдсон. Бид хэрэг хийсэн хүмүүс биш шүү дээ. Эмнэлгийнхэн нь хамгаалах хувцсаа өмсчихөөд суулгаад явж болно шүү дээ. Гэтэл тэгээгүй, бид хонь мал шиг байсан. Хонь малаа ч бид нар тийм харгисаар хариулахгүй шүү дээ. Ядартлаа бараг 2,3 цаг  алхаад явж байтал манай сумын хоёр халдвартай хүн хувийн машинаараа сумын төвийн эмнэлэг рүү явж таараад сумын эмнэлэг ортол тэр хоёр хүний машинд суугаад дайгдсан. 

-Одоо байгаа нөхцөл байдал нь ямархуу байна?

-Одоо сумынхаа эмнэлэгт тусгаарлагдсан байгаа. Шинжилгээний хариу өнөө орой гарна гэсэн учир хүлээгээд сууж байна. Толгой их өвдөж байна. Шинжилгээний хариу ямар гарахаас шалтгаалж эмчилгээ хийх үгүйгээ шийдэх байх.

Бидэнд мэдээлэл өгсөн танд баярлалаа.