БЗД-ийн 26-р хорооны Элизабет хотхоны зарим айлыг шинжилгээнээс орхигдуулж, "танайхыг үлдээчихсэн юм шиг байна, хаягаа үлдээ" гэх тайлбарыг өгчээ

Баянзүрх дүүргийн 26-р хороонд хязгаарлалтын дэглэм тогтоосон. Дүүргийн Онцгой комисс 16000 иргэнээс авах ёстой шинжилгээг 2 өдрийн дотор амжилттай авч дууслаа. Харин одоо "Орхон-овоот" компанитай хамтарч тусгай ариутгал, халдваргүйтгэлийн ажлыг эхлүүллээ гэх мэдээллийг БЗД-ийн Онцгой комисс албан ёсны цахим хуудастаа нийтэлснийг манай сайт албаны мэдээлэл болгон ашигласан юм. 

Гэтэл энэхүү мэдээллийн дагуу БЗД-ийн 26 дугаар хорооны Элизабет хотхоны оршин суугчид манай сайтад хандлаа. Тодруулбал Элизабет хотхоны 20 гаруй өрхийг шинжилгээнд хамрагдуулаагүй үлдээсэн гэх мэдээллийг өглөө. 

Өмнө нь Элизабет хотхон нь халдварын голомт болж байсан юм. Харин тус хотхоны оршин суугчид групп чат нээж, мэдээлэл солилцоход 214,221,219,220 дугаар байрны зарим өрхөөс шинжилгээ авалгүй үлдээсэн байжээ. 

Шинжилгээ авч дууслаа гэх мэдээллийг харсан иргэд" Манайхаас шинжилгээ авсангүй" гэж Өрхийн эрүүл мэндийн төв, Хороондоо хандахад "танайхыг үлдээчихсэн, юм шиг байна, хаягаа үлдээ" гэх хариултыг өгсөн талаар тус хотхоны 220-р байрны оршин суугч мэдээлж байгаа юм.